मुंबई : वृत्तसंस्था
राज्यातील अनेक जिल्ह्यात गेल्या काही दिवसांपासून महिलावर होणाऱ्या अत्याचाराच्या प्रमाणात मोठी वाढ झाली असून यामध्ये अल्पवयीन मुलीचं प्रमाण सर्वाधिक आहेत. नुकतेच मुंबई येथील टिळकनगर परिसरातून एक संतापजनक घटना समोर आली आहे. एका नराधम स्कूल बस चालकाने ११ वर्षीय शाळकरी मुलीवर लैंगिक अत्याचार केला आहे.
याप्रकरणी पीडित मुलीच्या आई-वडिलांनी दिलेल्या तक्रारीवरून पोलिसांनी ३२ वर्षीय आरोपी बसचालकाविरोधात पोस्को कायद्याअंतर्गत गुन्हा दाखल केला आहे. गुन्हा दाखल होताच आरोपीला अटक देखील करण्यात आली आहे. या घटनेनं परिसरातून संतापाची लाट उसळली आहे. मिळालेल्या माहितीनुसार, पीडित अल्पवयीन मुलगी शाळा संपल्यानंतर स्कूल बसमधून घरी परतत होती. यावेळी बसमध्ये कुणी नसल्याचा फायदा घेत आरोपी बसचालकाने तिला मोबाईलवर अश्लिल व्हिडीओ दाखवले. इतकंच नाही, तर आरोपीने बस लोकमान्य टिळक टर्मिनसच्या कारशेड परिसरात नेली.
तिथे तिच्यावर स्कूल बसमध्येच लैंगिक अत्याचार केला. याबाबत कुणाला सांगितल्यास जीवे मारण्याची धमकी देखील दिली. दरम्यान, घरी आल्यानंतर पीडितेने आपल्यासोबत घडलेला प्रकार आईला सांगितला. मुलीवर अत्याचार झाल्याचं कळताच आई-वडिलांनी तातडीने पोलिसांत धाव घेत तक्रार दाखल केली. दरम्यान, पीडितेच्या आई-वडिलांनी दिलेल्या तक्रारीनुसार पोलिसांनी ३२ वर्षीय आरोपी बसचालकाविरोधात लैंगिक अत्याचार, विनयभंग, अपहरण तसेच बालकांचे लैंगिक अत्याचारापासून संरक्षण कायद्यांतर्गत करण्यात गुन्हा दाखल केला असून त्याला अटक देखील केली आहे.
