चाळीसगाव (प्रतिनिधी) :
चाळीसगाव शहरातील डोंगरी नदीकाठी चामुंडा माता मंदिराजवळ पोलिसांनी कारवाई करत तब्बल १८ किलो ६८६ ग्रॅम गांजा जप्त केला आहे. या कारवाईत सुमारे ९ लाख ३४ हजार ३०० रुपये किमतीचा अंमली पदार्थ हस्तगत करण्यात आला असून, एका ४५ वर्षीय संशयिताला अटक करण्यात आली आहे.
चाळीसगाव शहर पोलीस ठाण्याचे पोलीस निरीक्षक अमितकुमार मनेळ यांना २५ ऑगस्ट रोजी गोपनीय माहिती मिळाली होती. डोंगरी नदीच्या काठी राहणाऱ्या एका व्यक्तीने विक्रीच्या उद्देशाने घरात गांजाचा साठा करून ठेवल्याची माहिती मिळाल्यानंतर पोलिसांनी विशेष पथक तयार केले.
विशेष पथकाने रात्री सुमारे १०.१० वाजता संबंधित घराची कायदेशीर प्रक्रिया पूर्ण करून झडती घेतली. यावेळी लोखंडी पलंगाखाली ठेवलेल्या दोन पिशव्यांमध्ये गांजा आढळून आला. पोलिसांनी पंचनामा करून हा मुद्देमाल जप्त केला.
या प्रकरणी भूषण केशव पवार (वय ४५, रा. डोंगरी नदीकाठ, चामुंडा माता मंदिराजवळ, चाळीसगाव) याच्याविरुद्ध चाळीसगाव शहर पोलीस ठाण्यात गुन्हा क्रमांक ४०२/२०२६ नोंद करण्यात आला आहे. एनडीपीएस कायद्यानुसार गुन्हा दाखल करून आरोपीला तपासासाठी अटक करण्यात आली आहे.
ही कारवाई वरिष्ठ पोलीस अधिकाऱ्यांच्या मार्गदर्शनाखाली करण्यात आली असून, पुढील तपास पोलीस पथकाकडून सुरू आहे.
