जळगाव : प्रतिनिधी
वनदाव्यांसह इतर मागण्यांकरीता लोक संघर्ष मोर्चातर्फे आदिवसी बांधवांनी जिल्हाधिकारी कार्यालयावर मोर्चा काढून तेथे पाच दिवस विना परवानगी धरणे आंदोलन केले. तसेच आकाशवाणी, स्वातंत्र्य चौकात रस्तारोको करुन सार्वजनिक रहदारीस अडथळा निर्माण केल्याप्रकरणी जिल्हापेठ पोलिस ठाण्यात लोक संघर्ष मोर्चाचे उपाध्यक्ष सचिन धांडे यांच्याविरुद्ध तीन वेगवेगळे गुन्हे दाखल करण्यात आले आहे.
आदिवसी बांधवांच्या न्याय व हक्कासाठी दि. १२ ऑक्टोंबर रोजी लोकसंघर्ष मोर्चातर्फे जिल्हाधिकारी कार्यालयावर मोर्चा काढण्यात आला होता. मोर्चानंतर जिल्हाधिकारी कार्यालयासमोर धरणे आंदोलन सुरु केले. सुमारे पाच दिवस सुरु असलेल्या आंदोलनात दि. १४ ऑक्टोंबर रोजी लोक संघर्ष मोर्चाचे उपाध्यक्ष सचिन धांडे यांनी आदिवसांची बांधवांना घेवून शहरातील आकाशवाणी व स्वातंत्र्य चौकात जावून रास्ताराको केला. यावेळी पोलिसांनी मोर्चाचे अध्यक्ष व उपाध्यक्षांना रस्ता मोकळा करण्यासाठी सांगितले असता, त्यांनी काही वेळ तेथे थांबून पुन्हा जिल्हाधिकारी कार्यालयासमोर आंदोलनाला बसले होते.
धरणे आंदोलन सुरु असतांना आंदोलकांनी रस्तारोको करुन सार्वजनिक रस्ता अडवून मोठमोठ्याने नारेबाजी करुन सार्वजनिक रहदारीस अडथळा निर्माण केल्याप्रकरणी व जिल्हाधिकारी कार्यालयासमोर जमावबंदी आदेश व प्रशासनाच्या मनाई आदेशाचे उल्लंघन करुन धरणे आंदोलन केल्याप्रकरणी दोन वेगवेगळे गुन्हे दाखल करण्यात आले आहे.
