जळगाव : प्रतिनिधी
शहरातील इस्लामपुरा भागातील कसाई गल्लीत बेकायदेशीरपणे गोमांस विक्री करणाऱ्या दुकानावर शनिवारी दि. २६ रोजी शनिपेठ पोलिसांनी छापा टाकला. याठिकाणाहून सुमारे ३० किलो गोमांस आणि मांस कापण्याचे साहित्य जप्त केले. याप्रकरणी आजम शेख सलीम शेख (वय २४) या संशयिताला ताब्यात घेण्यात आले असून त्याच्याविरुद्ध गुन्हा दाखल करण्यात आला आहे.
शहरातील शनिपेठ पोलीस स्टेशनचे सहाय्यक पोलीस निरीक्षक साजिद मन्सुरी यांना मिळालेल्या माहितीनुसार शहरातील इस्लामपुरा भागातील मदिना मशीद जवळ एका लाकडी पार्टीशनच्या दुकानात गोमांसाची बेकायदेशीर विक्री होत आहे. या माहितीची खात्री करण्यासाठी सपोनि मन्सुरी यांनी पोलीस पथक आणि दोन पंचांना पाचारण केले. सकाळी साडेदहा वाजेच्या सुमारास पोलीस पथक घटनास्थळी रवाना झाले.
घटनेचे गांभीर्य ओळखून पशुधन विकास अधिकारी डॉ. निलेश अशोक चोपडे यांना पाचारण करण्यात आले. त्यांनी घटनास्थळी येऊन मांसाची पाहणी केली आणि तपासणीसाठी सुमारे २०० ग्रॅम मांसाचे नमुने मिठासह हवाबंद डब्यात सील केले. हे नमुने फॉरेन्सिक लॅबकडे पाठवण्यात येणार आहेत. पोलीस कॉन्स्टेबल निलेश वासुदेव घुगे यांनी दिलेल्या फिर्यादीवरून संशयित आजम शेख सलीम शेख (वय २४, रा. इस्लामपुरा, जळगाव) याच्याविरुद्ध महाराष्ट्र प्राणी संरक्षण अधिनियमातंर्गत शनिपेठ पोलीस ठाण्यात गुन्हा दाखल करण्यात आला आहे.
ही कारवाई शनिपेठ पोलीस ठाण्याचे प्रभारी साजीद मन्सुर यांच्या मार्गदर्शनाखाली उपनिरिक्षक रविंद्र गायकवाड, पोहेकॉ शशिकांत पाटील, सुभाष चव्हाण, संभाज पाटील, गणेश ढाकणे, गजानन वाघ, निलेश घुगे यांच्या पथकाने केली
