जळगाव : प्रतिनिधी
वर्षभरापूर्वी मुंबईहून परतणारा प्रशांत प्रताप चौधरी (वय ३०, रा. जानकीनगर) हा तरुण येत असतांना तो रेल्वेतून पडून गंभीर जखमी झाला होता. वर्षभरापासून त्याच्यावर उपचार सुरु होते, मात्र रविवारी सकाळच्या सुमारास अखेर त्याची प्राणज्योत मालवली. याप्रकरणी पोलिसात अकस्मात मृत्यूची नोंद करण्यात आली आहे.
सविस्तर वृत्त असे कि, शहरातील जानकी नगरात सामान्य कुटूंबातील प्रशांत प्रताप चौधरी (वय २८) हा तरुण मिळेल ते, खासगी कामे करुन कुटूंबाला हातभार लावत होता. वर्षभरापुर्वी प्रशांत कामासाठी मुंबई गेला होता. तेथे कामधंदा करुन कुटूंबाला अधार ठरला होता. मुंबईहून जळगावी येत असतांना धावत्या रेल्वेतून पडून तो गंभीर जखमी झाला. वडीलांसह लहान भावाने शक्य ते उपचार करुन प्रशांतला नव आयुष्य मिळेल या अपेक्षेने सर्वस्व पणाला लावले. परंतू रविवारी सकाळी त्याची प्रकृती खालवल्याने त्याचा मृत्यू झाला. जिल्हा रुग्णालयात प्रशांतवर शविच्छेदन करुन मृतदेह कुटूंबीयांना सोपवण्यात आला. पोलिसांत अकस्मात मृत्युची नोंद करण्यात आली आहे.
