भुसावळ : प्रतिनिधी
शहरातील जळगाव रोडवरील अयोध्यानगर भागात भरदिवसा बंद घर फोडून चोरट्यांनी २ लाख ५९ हजारांचा ऐवज लांबविला. हा प्रकार दि. ११ फेब्रुवारी रोजी घडला. या प्रकरणी शहर पोलिसात अज्ञात चोरट्यांविरोधात गुन्हा दाखल करण्यात आला आहे.
मिळालेल्या माहितीनुसार, भुसावळ शहरातील अयोध्या नगरातील रहिवासी उमेश बाळू चिमणकर हे परिवारासह बाहेरगावी गेले होते. चोरट्यांनी दरवाजाचे कुलूप तोडले आणि घरातून १ लाख दोन हजार रुपये किमतीचे सोन्याचे दागिने, ७५ हजार रुपये किमतीची मंगल पोत, साडेचार ग्रॅम सोन्याची कर्णफुले, दोन अंगठ्या, लॅपटॉप आणि २० हजार रुपये रोख असा दोन लाख ५९ हजार रुपयांचा ऐवज लांबविला आहे. घरफोडीची माहिती कळताच, पोलिस उपअधीक्षक कृष्णांत पिंगळे, पोलिस निरीक्षक संदीप रणदिवे यांनी परिसराची पाहणी केली. पुढील तपास पोलिस उपनिरीक्षक अंबादास पाथरवट हे करीत आहेत.
