विजय पाटील :जळगाव | प्रतिनिधी
जळगाव एमआयडीसी पोलीस ठाण्याच्या हद्दीतील गाडेगाव शिवाराजवळील महामार्गावर शुक्रवारी भीषण कार अपघात झाला. जामनेरकडून जळगावकडे येणारी भरधाव कार रस्त्याच्या कडेला बंद पडून उभ्या असलेल्या ट्रकवर मागून जोरात धडकली. या भीषण अपघातात दोन जणांचा जागीच मृत्यू झाला असून चार जण गंभीर जखमी झाले आहेत.
प्राथमिक माहितीनुसार, रस्त्याच्या कडेला बंद पडलेला ट्रक उभा असताना भरधाव कार थेट त्याच्या मागील बाजूस धडकली. धडक इतकी भीषण होती की कारचा पुढील भाग पूर्णपणे चुराडा झाला. अपघाताची माहिती मिळताच एमआयडीसी पोलीस, स्थानिक नागरिक आणि बचाव पथकाने घटनास्थळी धाव घेत जखमींना बाहेर काढून तातडीने रुग्णालयात हलविले.
अपघातातील गंभीर जखमी चौघांना जळगाव येथील शासकीय वैद्यकीय महाविद्यालय व रुग्णालयात उपचारासाठी दाखल करण्यात आले आहे. अपघाताची माहिती समजताच जखमी आणि मृतांच्या नातेवाईकांनी रुग्णालयात मोठी गर्दी केली.
दरम्यान, मृत्यू झालेल्या दोघांची ओळख अद्याप पटलेली नसून, त्यांची ओळख पटविण्याचे प्रयत्न सुरू आहेत. या प्रकरणी एमआयडीसी पोलीस ठाण्यात घटनेची नोंद करण्याचे काम सुरू असून, अपघाताचे नेमके कारण तपासले जात आहे.
