विजय पाटील : लाईव्ह महाराष्ट्र न्युज
भुसावळ शहर पोलिसांनी मोटारसायकल चोरीच्या गुन्ह्यांवर मोठी कारवाई करत एका सराईत आरोपीला अटक केली असून, त्याच्याकडून तब्बल सहा चोरीच्या मोटारसायकली जप्त करण्यात यश मिळवले आहे. या कारवाईमुळे भुसावळ, जामनेर, अमळनेर आणि चोपडा परिसरातील मोटारसायकल चोरीच्या अनेक गुन्ह्यांचा उलगडा झाला आहे.
२३ जानेवारी २०२६ रोजी भुसावळ येथील झेडटीएस रोडवरील एमओएच पार्किंगमधून सुमारे १५ हजार रुपये किमतीची हिरो स्प्लेंडर मोटारसायकल चोरीला गेली होती. याप्रकरणी विजय जगन्नाथ खडके यांनी भुसावळ शहर पोलीस ठाण्यात तक्रार दाखल केली होती.
तपासादरम्यान डी.बी. पथकातील पोलीस कॉन्स्टेबल राहुल बेहेनवाल आणि पोलीस कॉन्स्टेबल कुणाल सोनवणे यांना गुप्त बातमीदारामार्फत आरोपी चोपडा बसस्थानक परिसरात असल्याची माहिती मिळाली. उपविभागीय पोलीस अधिकारी केदार बारबोले आणि पोलीस निरीक्षक महेश गायकवाड यांच्या मार्गदर्शनाखाली पोलिसांनी तातडीने सापळा रचून आरोपीला ताब्यात घेतले.
चौकशीत आरोपीने आपले नाव विशाल राजेंद्र राठोड (वय ४६, रा. भीकनगाव, जि. खरगोन, मध्य प्रदेश) असे सांगितले. पुढील चौकशीत त्याने भुसावळ, जामनेर आणि अमळनेर परिसरातून मोटारसायकली चोरी केल्याची कबुली दिली.
पोलिसांनी आरोपीकडून एकूण सहा चोरीच्या मोटारसायकली जप्त केल्या असून, आणखी गुन्ह्यांचा तपास सुरू आहे.
ही कारवाई जिल्हा पोलीस अधीक्षक श्रीकांत ढिवरे, अपर पोलीस अधीक्षक संदीप गावित, उपविभागीय पोलीस अधिकारी केदार बारबोले आणि पोलीस निरीक्षक महेश गायकवाड यांच्या मार्गदर्शनाखाली पार पडली. या मोहिमेत पोलीस नाईक अब्दुल रज्जाक खान, पोलीस कॉन्स्टेबल सुबोध मोरे, राहुल बेहेनवाल, कुणाल सोनवणे आणि दीपक पाटील यांनी महत्त्वाची भूमिका बजावली.
या धडक कारवाईमुळे मोटारसायकल चोरट्यांमध्ये खळबळ उडाली असून, भुसावळ शहर पोलिसांच्या कामगिरीचे नागरिकांकडून कौतुक होत आहे.
