भुसावळ : प्रतिनिधी
शहरातील गंगाराम प्लॉट परिसरात राहणाऱ्या १६ वर्षीय प्रतीक अनिल महाजन या विद्यार्थ्याचा तापी नदीत बुडून शनिवारी दुपारी दुर्दैवी मृत्यू झाला. या घटनेमुळे परिसरात हळहळ व्यक्त होत असून महाजन कुटुंबावर दुःखाचा डोंगर कोसळला आहे.
मिळालेल्या माहितीनुसार, प्रतीक महाजन हा आपल्या एका मित्रासोबत शहरातील पूजा कॉम्प्लेक्सजवळील तापी नदीपात्रात पोहण्यासाठी गेला होता. दुपारी सुमारे १२.३० वाजेच्या सुमारास दोघेही नदीत पोहत असताना प्रतीक अचानक खोल पाण्यात गेला. पोहण्याचा अंदाज चुकल्याने तो पाण्यात बुडू लागला. त्याच्यासोबत असलेल्या मित्राने प्रसंगावधान राखून स्वतःचा जीव वाचवला, मात्र प्रतीकचा पाण्यात शोध लागत नव्हता.
घटनेची माहिती मिळताच भुसावळ नगर परिषदेच्या अग्निशमन विभागाच्या बचाव पथकाने तातडीने घटनास्थळी धाव घेतली. बचाव पथकाने स्थानिक नागरिकांच्या मदतीने नदीत शोधमोहीम सुरू केली. अनेक तासांच्या अथक प्रयत्नांनंतर नदीतील एका कपारीत अडकलेला प्रतीकचा मृतदेह शोधून बाहेर काढण्यात आला. प्रतीक महाजन याने नुकताच अकरावी इयत्तेत प्रवेश घेतला होता. त्याच्या अकाली निधनाने मित्रपरिवार, शाळा तसेच परिसरात शोककळा पसरली आहे. सायंकाळी ७ वाजता शोकाकुल वातावरणात त्याच्यावर अंत्यसंस्कार करण्यात आले. या दुर्दैवी घटनेनंतर नदीपात्रात पोहताना नागरिकांनी विशेषतः विद्यार्थ्यांनी आवश्यक काळजी घेण्याची गरज पुन्हा अधोरेखित झाली आहे.
