जळगाव : प्रतिनिधी
भरधाव डंपरने धडक देत चिरडल्याने बशीरशा मकबूलशा शाह फकीर (७५, रा. वराड, ता. जळगाव) हे जागीच ठार झाले. हा अपघात २८ मार्च रोजी रात्री वराड, ता. जळगाव येथे झाला. अपघात होताच नागरिकांनी प्रचंड संताप व्यक्त केला. एमआयडीसी पोलिसांनी डंपर ताब्यात घेतला. या प्रकरणी चालक नितीन वसंत मिस्तरी (रा. दापोरे, ता. एरंडोल) व मालक भूषण सुधाकर चव्हाण (रा. धानोरा, ता. जळगाव) या दोघांना अटक करण्यात आली असून दोघांनाही एक दिवसाची पोलिस कोठडी सुनावण्यात आली.
मिळालेल्या माहितीनुसार, वराड येथील बशीरशा फकीर हे कामानिमित्त गावातील बसस्थानकाकडे गेले होते. त्यावेळी एक डंपर (क्र. एमएच ४७, एएस ५१४८) गावातून जात असताना जोरदार धडक दिली. अपघाताची माहिती मिळताच मयताचे कुटुंबीय व नागरिकांनी रुग्णालयात धाव घेतली. त्यामुळे रुग्णालयात मोठी गर्दी झाली होती. हा डंपर गावात वाळू खाली करून जात होता, असे गावकऱ्यांचे म्हणणे आहे. भरधाव वाळूचे डंपर नागरिकांच्या जीवावर उठले असून प्रशासन कठोर भूमिका घेत नसल्याचा आरोप नागरिकांनी केला. अपघात होताच गावातील नागरिकांनी प्रचंड रोष व्यक्त केला. भरधाव डंपरचा बंदोबस्त झालाच पाहिजे, अशी मागणी केली. या वेळी अनेक जण आक्रमक झाले होते. यावेळी पोलिसांनी त्यांची समजूत काढत संबंधितांवर कारवाईची ग्वाही देत डंपर पोलिस ठाण्यात नेला.
