जळगाव : प्रतिनिधी
शहरातील भाऊंच्या उद्यानाजवळ एका तरुणाला विनाकारण मारहाण करून त्याच्या खिशातील दीड ते दोन हजार रुपयांची रोकड जबरदस्तीने हिसकावून नेल्याची घटना रविवारी दुपारी १:३० वाजता घडली. याप्रकरणी रात्री १०:०० वाजता रामानंदनगर पोलिस ठाण्यात अज्ञात व्यक्तीविरुद्ध गुन्हा दाखल करण्यात आला आहे.
सविस्तर वृत्त असे कि, सुभाष रामराव घुगे (वय ३४, रा. अकोला, ह. मु, आयोध्यानगर, जळगाव) हा तरुण कामाच्या निमित्ताने जळगावात राहतो. रविवारी दुपारी सुभाष हा भाऊंच्या उद्यानाजवळ आला असता, एका अज्ञात व्यक्तीने त्याच्याशी वाद घालत शिवीगाळ करीत मारहाण करून जीवे मारण्याची धमकी दिली. तसेच त्याच्या खिशातील रोकड हिसकावून पसार झाला.
घटनेनंतर सुभाष घुगे यांनी तातडीने रामानंदनगर पोलिस ठाण्यात तक्रार दाखल केली. त्यानुसार रात्री १०:०० वाजता अज्ञात व्यक्तीविरुद्ध गुन्हा दाखल करण्यात आला. या प्रकरणाचा तपास पोलिस उपनिरीक्षक प्रदीप बोरुडे करीत आहेत. दरम्यान, बाहेरगावाहून जळगावात राहण्यासाठी आलेले असताना हातची रक्कम गेल्याने तरुणावर मोठे आर्थिक संकट ओढावले आहेत.
