अमळनेर : प्रतिनिधी
तालुक्यातील मंगरूळ शिवारात धुळे रस्त्यावरील सेंट मेरी हायस्कूलजवळ एसटी बस व दुचाकीत झालेल्या अपघातात दुचाकीवरील खडके येथील महिला जागीच ठार तर त्यांचा पती गंभीर जखमी झाल्याची घटना २१ रोजी सायंकाळच्या सुमारास घडली. अरुणाबाई समाधान राजपूत (वय ४९) असे मयत महिलेचे नाव आहे.
मिळालेल्या माहितीनुसार, दरम्यान, खडके येथील अरुणाबाई राजपूत व त्यांचे पती समाधान रुपसिंग राजपुत हे दुचाकीने अमळनेरकडून खडके येथे जात होते. मंगरुळ जवळील सेंट मेरी हायस्कूलजवळ समोरून येणाऱ्या कल्याण ते रावेर एसटी बसने त्यांच्या दुचाकीस जबर धडक दिली. या अपघातात दुचाकीवर मागे बसलेल्या अरुणाबाई राजपूत या जागीच ठार झाल्यात. तर समाधान राजपूत हे गंभीर जखमी झाले असून त्यांना डॉ. अनिल शिंदे यांच्या नर्मदा मेडिकल फाऊंडेशनमध्ये उपचारार्थ दाखल करण्यात आले असून तेथेच त्यांच्यावर उपचार सुरू आहेत. दरम्यान, घटनेची माहिती मिळाल्यानंतर नातेवाईकांनी घटनास्थळी व त्यानंतर पोलिसांत धाव घेऊन एसटी चालकाविरुद्ध फिर्याद दिली आहे. रात्री उशिरापर्यंत या संदर्भात गुन्हा नोंदवण्यात आला.
