भुसावळ : प्रतिनिधी
शहरातील खडका रोडवरील हिरा हॉलजवळ शनिवारी दुपारी चार वाजेच्या सुमारास जुन्या वादातून खाद्यपदार्थ विक्रेता अजीम शेख (३५) यांच्यावर चाकू व लोखंडी रॉड मारून प्राणघातक हल्ला करण्यात आला. त्यांच्यावर खासगी रुग्णालयात उपचार सुरू आहेत. याप्रकरणी अजीम खान यांच्या फिर्यादीवरून काफील खान ऊर्फ बंटी शकील खान (३६), शादाब खान ऊर्फ गोलू (२६) यांना ताब्यात घेतले. न्यायालयात हजर केले असता त्यांना १६ पर्यंत पोलिस कोठडीत ठेवण्याचा आदेश न्यायालयाने दिला आहे. रेहान शकील खान (२०) हा फरार आहे.
मिळालेल्या माहितीनुसार, अजीम शेख हे खाद्यपदार्थ विक्री करून उदरनिर्वाह करतात. शुक्रवारी त्यांचा लहान भाऊ रईसोद्दीन शेख व मित्र शाहरुख खाटीक व आरोपीचा भाऊ यांच्या कुठल्यातरी कारणावरून वाद झाला होता. या वादाचा वचपा काढण्यासाठी खडका रोडवरील हिरा हॉलजवळ शनिवारी दुपारी चार वाजेच्या सुमारास अजीम शेख येताच तिघांनी हल्ला केला. लोखंडी रॉडचा उपयोग करीत अजीम यांना मारहाण केली. चाकूने भोसकून गंभीर जखमी केले आहे. त्यांच्यावर खासगी रुग्णालयात उपचार सुरू आहेत. घटनेची माहिती मिळताच डीवायएसपी कृष्णात पिंगळे, बाजारपेठ निरीक्षक बबन आव्हाड व डीबी पथकाने घटनास्थळी धाव घेतली.
