जळगाव : प्रतिनिधी
शहरातील मानराज पार्कजवळ परिसरात शतपावली करतांना मोबाईलवर बोलत असलेल्या प्रौढाचा मोबाईल दुचाकीवरुन आलेल्या तिघांनी लांबवल्याची घटना बुधवारी रात्री साडेदहा वाजेच्या सुमारास घडली. जिल्हापेठ पोलिसांनी तपासचक्रे फिरवित लागलीच संशयित गजानन उर्फ बबन प्रकाश कोळी (वय १९, रा. शिवकॉलनी) याला अटक केली असून त्याच्या दोघ साथीदारांचा शोध घेत आहे. त्याच्याकडून पोलिसांनी चोरलेला मोबाईल व दुचाकी हस्तगत करण्यात आली आहे.
मिळालेल्या माहितीनुसार, शहराती मानराज पार्कमधील दौप्रदी नगरात सुमित एकनाथ भामरे (वय ५७) हे वास्तव्यास असून ते जनता बँकेत सहाय्यक व्यवस्थापक म्हणून नोकरीस आहे. दि. १० रोजी बुधवारी रात्री जेवण केल्यानंतर भामरे हे फोनवर बोलत शतपावली करण्यासाठी निघाले. अॅक्सीस बँकेकडून ते शतपावली करीत असतांना विनाक्रमांकाच्या दुचाकीवरुन ट्रिपलसीट आलेल्या चोरट्यांनी भामरे यांच्या हातातील मोबाईल जबरदस्तीने हिसकावून नेला. त्यानंतर भामरे यांनी लागलीच जिल्हापेठ पोलिसात धाव घेत पोलिसांना घटनेविषयी माहिती दिली. त्यानंतर गुरुवारी पोलिसात सुमित भामरे यांच्या तक्रारीवरुन गुन्हा दाखल करण्यात आला.
मोबाईलसह दुचाकी हस्तगत संशयित गजानन उर्फ बबन याला पोलिसांन खाक्या दाखविताच त्याने आपल्या अन्य दोन साथीदारांसोबत गुन्हा केल्याची कबुली दिली. त्याच्याकडून पोलिसांनी चोरलेला मोबाईल व दुचाकी हस्तगत करण्यात आली आहे. पोलिस त्याच्या इतर साथीदारांचा देखील शोध घेत आहे.
