भुसावळ : प्रतिनिधी
शहरातील श्रीहरीनगरमध्ये बंद घराचे कुलूप तोडून दहा लाखांची रोकड लांबवली. ही घटना भरदिवसा रविवारी दुपारी तीन ते साडेतीन वाजेच्या दरम्यान घडली.
भुसावळ शहरातील श्रीहरीनगरातील श्रीसत्य अपार्टमेंट समोरील घरमालक मुकेशकुमार कुमावत (वय ४५) हे साइटवर मार्बल फिटिंगच्या कामाला गेले होते. तर दुपारी त्यांच्या पत्नी भाजी आणण्यासाठी गेल्या होत्या. चोरट्याने ही संधी साधत दुपारी तीन ते साडेतीन वाजेच्या सुमारास घराच्या मागील दरवाजाचे कुलूप तोडून आत प्रवेश केला व हॉलमध्ये ठेवलेल्या पलंगातील तब्बल दहा लाखांची रोकड घेऊन पोबरा केला. अर्ध्या तासाने कुमावत यांच्या पत्नी घरी परतल्यावर चोरीचा उलगडा झाला. सुदैवाने कपाटात ठेवलेले सोन्याचे दागिने सुरक्षित राहिले. दरम्यान, माहिती मिळताच बाजारपेठ पोलिस ठाण्याचे पोलिस अधिकारी, कर्मचारी घटनास्थळी दाखल झाले. बाजूला असलेले सीसीटीव्ही कॅमेऱ्याचे फुटेजही तपासण्यात आले. दरम्यान शहरामध्ये भर दिवसा घरफोडी होत असल्याने नागरिकांमध्ये भीतीचे वातावरण आहे. रविवारी रात्री उशिरापर्यंत याबाबत बाजारपेठ पोलिस ठाण्यात गुन्हा दाखल झालेला नव्हता.
