मुंबई : वृत्तसंस्था
देशातील आगामी लोकसभा निवडणुकीच्या जागा वाटपाच्या मुद्यावर शिवसेना (ठाकरे) पक्षप्रमुख उद्धव ठाकरे यांनी शनिवारी राष्ट्रवादी काँग्रेसशी (पवार गट) जवळपास मतैक्य झाल्याचे स्पष्ट केले. जागावाटपाच्या मुद्यावर आमचे राष्ट्रवादीशी जवळपास एकमत झाले आहे. पुढील 2 दिवसांत आमची वंचित बहुजन आघाडीशी चर्चा होईल. पण काँग्रेसने अद्याप आमच्याकडे जागावाटपाचा कोणताही फॉर्म्युला पाठवला नाही, असे ते म्हणालेत.
राष्ट्रवादीच्या अजित पवार गटातील संजय वाघेरे यांनी शनिवारी ठाकरे गटात प्रवेश केला. यावेळी घेतलेल्या पत्रकार परिषदेत उद्धव ठाकरे यांनी राम मंदिर, मविआतील जागा वाटप व लोकसभा निवडणुकीसह विविध मुद्यांवर भाष्य केले.
ठाकरे म्हणाले की, वंचित बहुजन आघाडीशी आमची बोलणी सुरू आहे. पुढील 2 दिवसांत संजय राऊत यांच्या नेतृत्वात वंचितशी बोलणी होईल. त्यानंतर शिवसेना, राष्ट्रवादी व वंचित यांची बैठक होऊन पुढील संवाद साधला जाईल. विशेषतः प्रकाश आंबेडकर व माझी प्रत्यक्ष भेट झाल्यानंतर हा मुद्दा निकाली काढला जाईल. पण त्यांनी ठेवला 12-12 चा कोणताही फॉर्म्युला माझ्यापर्यंत आला नाही, असे ते म्हणाले.
