नवी दिल्ली : वृत्तसंस्था
देशभरात नव्या वर्षात प्रत्येक हिंदूचे स्वप्न साकार होणार आहे. त्यापूर्वी पंतप्रधान नरेंद्र मोदी यांनी आज शनिवारी उत्तर प्रदेशच्या अयोध्या रेल्वे स्टेशनचं लोकार्पण केलं. तसेच यावेळी वंदे भारत आणि अमृत भारत ट्रेनला हिरवा झेंडा दाखवला. याच लोकार्पण सोहळ्यातील कार्यक्रमात पंतप्रधान मोदींनी उपस्थितांना संबोधित केलं. ‘२२ जानेवारीला घराघरात दीपोत्सव साजरा करा’, असं आवाहन पंतप्रधान नरेंद्र मोदी यांनी राम मंदिर लोकार्पण सोहळ्याच्या पार्श्वभूमीवर लोकांना केलं.
पंतप्रधान नरेंद्र मोदी यांनी म्हटलं की,’राममय अयोध्या धाममध्ये आज विविध विकास योजनेचा लोकार्पण आणि पायाभरणी कार्यक्रमाचा अभिमान वाटत आहेत. आता संपूर्ण जग २२ जानेवारीच्या ऐतिहासिक क्षणाची वाट पाहत आहेत. यामुळे अयोध्यावासीतील लोकांमध्ये उत्साह निर्माण होणं स्वाभाविक आहे’.
पंतप्रधान नरेंद्र मोदी यांनी पुढे म्हटलं, ‘एके काळी अयोध्यामध्ये रामलल्ला एका तंबूत होते. आता त्यांना पक्कं घर मिळालं आहे. फक्त रामलल्ला यांनाच नाहीतर देशातील ४ कोटी गरीबांनाही पक्कं घर मिळालं आहे. आज आम्ही घराघरात पाणी पोहोचवत आहेत. घरात पाणी पोहोचवण्यासाठी पाण्याच्या दोन लाखांहून अधिक टाक्या बसविण्यात आल्या आहेत’.
