नागपूर : वृत्तसंस्था
फुग्याच्या सिलिंडरचा स्फोट झाल्यामुळे नातेवाइकांसह खरेदीसाठी आलेला एक चार वर्षांचा चिमुकला ठार झाला, तर या स्फोटात दोन महिला जखमी झाल्या. ही घटना सदर पोलिस ठाण्याच्या हद्दीत बिशप कॉटन स्कूल समोरील मैदानासमोर रविवारी रात्री ८:३० वाजण्याच्या सुमारास घडली. या घटनेमुळे परिसरात खळबळ उडाली.
मिळालेल्या माहितीनुसार, सिझान आसिफ शेख (वय ४, रा. मानकापूर) असे मृत चिमुकल्याचे नाव आहे, तर फरिया हबीब शेख (२८) आणि अनमता हबीब शेख (२४) असे जखमी महिलांची नावे आहेत. फारिया व अनमता या सिझानच्या मावशी आहेत. त्या खरेदीसाठी बिशप कॉटन स्कूल समोरील मैदानासमोर गेल्या होत्या. तेथे रात्री ८:३० वाजता एक फुगेवाला गॅसने भरलेले फुगे विकत होता. फुगेवाल्याच्या बाजूला तिघेही उभे असताना अचानक सिलिंडरचा स्फोट होऊन ते हवेत उडाले. त्यानंतर ते सिलिंडर सिझानच्या डोक्यावर आदळले. यात सिझान गंभीर जखमी झाला, तर फरिया व अनमता यांनाही सिलिंडर लागल्यामुळे त्या जखमी झाल्या. घटनेमुळे परिसरात खळबळ उडाली. जखमी अवस्थेतील सिझान, फरिया व अनमता यांना कुटुंबीयांनी मेयो रुग्णालयात दाखल केले. यातील सिझानला डॉक्टरांनी तपासून मृत घोषित केले. जखमी फरिया आणि अनमता यांच्यावर मेयो रुग्णालयात उपचार सुरू आहेत. घटनेनंतर सदर पोलिसांचा ताफा घटनास्थळी पोहोचला. त्यांनी घटनास्थळाचा पंचनामा केला.
