पाचोरा : प्रतिनिधी
जळगाव जिल्ह्यातील भडगाव तालुक्यात नुकतीच एक अल्पवयीन मुलीवर अत्याचार करीत खून केल्याची घटना घडली होती. त्यानंतर या घटनेवरून जळगाव जिल्ह्यात अनेक ठिकाणी आक्रोश मोर्चा निघाला होता. हा मोर्चा भडगाव शहरात देखील निघाला होता यावेळी मुख्यमंत्र्यांनी थेट फोन करीत मुलीच्या पालकांना धीर देत प्रशासनाला आदेश देखील दिले होते. याचे वृत्तांकन स्थानिक पत्रकार संदीप महाजन यांनी केले होते. याप्रकरणी दुसऱ्या दिवशी आमदार किशोर पाटील यांची रेकॉर्डिंग सोशल मीडियावर मोठ्या प्रमाणात व्हायरल झाली होती. त्यानंतर त्या पत्रकाराला पाचोर्यातील भरचौकात मारहाण झाल्याची घटना घडली आहे.
काय आहे प्रकरण
भडगाव तालुक्यातील एका गावात अल्पवयीन मुलींवर अत्याचार करीत नराधमाने खून केल्याची घटना बाहेर येतात पोलिसांनी लागलीच संशयीत आरोपीला जेरबंद केले होते. त्यानंतर भडगाव शहरात जन आक्रोश मोर्चा निघाला होता. या मोर्चात मुख्यमंत्री एकनाथ शिंदे यांनी थेट फोन करीत परिवाराची विचारपूस करीत प्रशासनाला आदेश दिले होते. याचे वृत्तांकन स्थानिक पत्रकार असलेले संदीप महाजन यांनी केले. यामध्ये मुख्यमंत्री एकनाथ शिंदे यांच्यावर भाष्य करणारी बातमी देखील संदीप महाजन यांनी दिली होती. ती बातमी आमदार किशोर पाटील यांना चांगलीच झोंबल्यानंतर त्यांनी थेट पत्रकार संदीप महाजन यांना फोन करीत अश्लील शिवीगाळ केली होती ते एवढ्यावर थांबले नाही तर त्यांनी थेट आज त्यांच्या समर्थकांकडून या पत्रकाराला भर चौकात मारहाण केले असल्याचे देखील बोलले जात आहे.
