जळगाव : प्रतिनिधी
बहिणीचा वाढदिवस असल्याने तिला पैसे देऊन कपडे घेण्यासाठी पाठवून हितेश संदीप कोळी (वय १९, रा. कुसुंबा, ता. जळगाव) या तरुणाने गळफास घेत आपली जीवनयात्रा संपविली. ही घटना दि. १० ऑक्टोबर रोजी कुसुंबा येथे घडली. याप्रकरणी एमआयडीसी पोलिसात अकस्मात मृत्यूची नोंद करण्यात आली आहे.
मिळालेल्या माहितीनुसार, तालुक्यातील कुसुंबा येथे राहणारे हितेश कोळी चटई कंपनीत कामाला होते. हितेश कोळी याच्या बहिणीचा ११ ऑक्टोबर रोजी वाढदिवस असल्याने त्याने तिला पैसे दिले. तसेच बहीण व आईला कपडे घेण्यासाठी पाठविले. त्या वेळी घरी एकटाच असताना या तरुणाने गळफास घेतला. रात्री आई व बहीण घरी आले तेव्हा ही घटना लक्षात आली. त्या वेळी तरुणास शासकीय वैद्यकीय महाविद्यालय व रुग्णालयात दाखल केले असता डॉक्टरांनी मृत घोषित केले. या प्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे. ही घटना घडली त्या वेळी तरुणाचे वडील नाशिक येथे गेलेले होते. मयताच्या पश्चात आई, वडील, बहीण, लहान भाऊ असा परिवार आहे.
