चोपडा : प्रतिनिधी
अडावद वन विभागाच्या फिरत्या पथकाने दि.३ ऑक्टोंबर २०२६ रोजी सकाळी पाटचारीवर गस्त घालताना विना नंबरच्या दुचाकीवरून सागवानी अनघड बेलनाची अवैध वाहतूक करून सागवानी लाकडाची तस्करीचा बेत हाणून पाडला. यात वन विभागाने १ लाख ४० हजारांच्या ५ दुचाकी आणि २० हजार ६२५ रुपयांचे अनघड बेलन असा १ लाख ६० हजार ६२५ रुपयांचा मुद्देमाल हस्तगत केला आहे.
मिळालेल्या माहितीनुसार, वनरक्षक आर. एस. निकुंभे यांना ३ रोजी पहाटे ५ वाजेचा सुमारास मिळालेल्या गुप्त माहितीवरून वनपाल योगेश साळुंखे व अडावद राऊंड स्टाफसह, बोरमळी ते अडावद पाटचारी रस्त्याने पथक सामूहिक गस्त घालत होते. या वेळी अज्ञात व्यक्ती विना क्रमांकाच्या ५ दुचाकीवरुन सागाचे अनघड बेलन वाहतूक करतांना दिसले. त्यांना अडवण्याचा प्रयत्न केला असता ते व्यक्ती मुद्देमाल व दुचाकी रस्त्याचा कडेला फेकून पसार झाले.
त्यांच्याकडून ९० हजारांच्या तीन सीबी शाईन, ५० हजारांच्या दोन हिरो स्पलेंडर यासह २० हजार ६२५ रुपयांचे लहान, मोठे १ हजार २५ नग अनघळ बेलन असा ऐकूण १ लाख ६० हजार ६२५ रुपयांचा मुद्देमाल जप्त करण्यात आला. हा वन गुन्हा वनरक्षक आर. एस. निकुंभे यांच्याकडे दाखल करण्यात आला असून तपास वनपाल योगेश साळुंखे करत आहेत. ही कारवाई उप वनसंरक्षक सौरिष सहाय, सहाय्यक वनसंरक्षक एम. बी. पाटील, वनक्षेत्रपाल प्रशांत साबळे यांच्या मार्गदर्शनात वनपाल योगेश साळुंखे, वनरक्षक राकेश निकुंभे, वनमजूर संजय बेलदार, प्रकाश सपकाळे, बापू कोळी, संजय तडवी, योगेश सपकाळे, राजेश जोशी, हर्षल जोशी, भिकन तडवी, इतबार तडवी, राजू पाटील यांनी केली.
