बोदवड चौक ते परिवर्तन चौकापर्यंत धडक; संविधान बचावाच्या घोषणांनी परिसर दणाणला
मुक्ताईनगर (प्रतिनिधी मनोज पाटील) : अनुसूचित जाती आरक्षणाच्या उपवर्गीकरणाला विरोध तसेच संविधान बचाव आणि देश बचावाच्या भूमिकेतून मुक्ताईनगर येथे भव्य महामोर्चा काढण्यात आला. बोदवड चौकापासून सुरू झालेला हा मोर्चा परिवर्तन चौकापर्यंत काढण्यात आला. यावेळी नागरिक, महिला, आंबेडकरी अनुयायी तसेच बहुजन समाजातील कार्यकर्ते मोठ्या संख्येने सहभागी झाले.
मोर्चामध्ये सहभागी आंदोलकांनी निळे झेंडे, भारतीय राष्ट्रध्वज आणि विविध मागण्यांचे फलक हातात घेतले होते. ‘आरक्षण बचाव, देश बचाव’ आणि ‘संविधान बचाव, देश बचाव’ अशा घोषणांनी परिसर दणाणून गेला.
मोर्चाच्या अग्रभागी ‘अनुसूचित जाती आरक्षण उपवर्गीकरण विरोधी महामोर्चा’ असा मजकूर असलेला मोठा फलक झळकत होता. तसेच भारतरत्न डॉ. बाबासाहेब आंबेडकर यांच्यासह विविध महापुरुषांच्या प्रतिमा हातात घेऊन आंदोलकांनी आपली भूमिका मांडली.
बोदवड चौकातून सुरू झालेला मोर्चा परिवर्तन चौकात पोहोचल्यानंतर शिष्टमंडळाने तहसीलदारांची भेट घेऊन निवेदन सादर केले. अनुसूचित जाती आरक्षणाच्या उपवर्गीकरणाला विरोध करत शासनाने या मागणीचा गांभीर्याने विचार करावा, अशी भूमिका आंदोलकांनी मांडली.
या महामोर्चामुळे मुक्ताईनगर शहरात काही काळ आंदोलनाचे वातावरण निर्माण झाले होते. मोठ्या संख्येने नागरिकांच्या सहभागामुळे मोर्चाला उत्स्फूर्त प्रतिसाद मिळाल्याचे आयोजकांकडून सांगण्यात आले.
