लाईव्ह महाराष्ट्र न्युज : नाशिक विभागातील बहुचर्चित १६० कोटी रुपयांच्या बोगस शालार्थ आयडी घोटाळ्याप्रकरणी विशेष तपास पथकाने (SIT) आणखी एक मोठी कारवाई करत जळगावचे सेवानिवृत्त माध्यमिक शिक्षणाधिकारी शशिकांत हिंगोणेकर यांना अटक केली आहे. त्यांना धुळे येथून ताब्यात घेण्यात आले असून, नाशिक रोड पोलिसांनी ही कारवाई केली.
तपासानुसार, बनावट शालार्थ आदेश आणि बोगस शालार्थ आयडींच्या माध्यमातून शासनाची सुमारे १६० कोटी रुपयांची फसवणूक करण्यात आल्याचा आरोप आहे. या प्रकरणात अनेक बनावट शिक्षकांची नोंद करून वेतन आणि थकबाकीची रक्कम काढण्यात आल्याचा संशय तपास यंत्रणेला आहे.
या घोटाळ्याचा तपास सुरू असून, आणखी काही शिक्षणाधिकारी, संस्थाचालक आणि संबंधित व्यक्तींची भूमिका संशयाच्या भोवऱ्यात आहे. SITकडून पुढील काळात आणखी मोठ्या कारवाया होण्याची शक्यता व्यक्त केली जात आहे.
