जळगाव | प्रतिनिधी
जळगाव शहरातील दुभाजकांवर (डिव्हायडर) लावण्यात आलेल्या भंगाळे गोल्डच्या नियमबाह्य जाहिरात फलकांवर अखेर महानगरपालिकेच्या अतिक्रमण विभागाने कारवाई करत संबंधित फलक हटवले. सामाजिक कार्यकर्ते ॲड. पियुष नरेंद्रअण्णा पाटील यांनी केलेल्या लेखी तक्रारीनंतर उपायुक्तांनी दिलेल्या आदेशानुसार ही कारवाई करण्यात आली.
महानगरपालिकेने शहरातील विविध दुभाजक सामाजिक संस्था, स्वयंसेवी संस्था (NGO) आणि उद्योजकांना निश्चित अटी व शर्तींवर विकसित करण्यासाठी दिले होते. या करारानुसार जाहिरात फलकांमध्ये किमान १० मीटरचे अंतर ठेवणे, फलकांवर ४० टक्के जागा मनपाच्या जनजागृती व सार्वजनिक हिताच्या जाहिरातींसाठी राखीव ठेवणे आणि उर्वरित ६० टक्के जागेवर संबंधित संस्थेची किंवा व्यावसायिकांची जाहिरात करण्याची अट होती. तसेच सुशोभीकरणाचे काम पूर्ण झाल्यानंतर जाहिरात फलक लावण्यापूर्वी मनपाची ‘ना हरकत’ (NOC) घेणेही बंधनकारक करण्यात आले होते.
मात्र, संबंधितांनी या अटींचे उल्लंघन करत १० मीटर अंतराचा नियम न पाळता फलक उभारले. तसेच १०० टक्के जागेवर स्वतःच्या व्यवसायाची जाहिरात प्रसिद्ध केल्याचा आरोप करण्यात आला होता.
याप्रकरणी ॲड. पियुष नरेंद्रअण्णा पाटील यांनी महानगरपालिका आयुक्तांकडे सविस्तर लेखी तक्रार दाखल केली होती. त्यानंतर २४ जुलै २०२६ रोजी उपायुक्तांनी संबंधितांना स्वतःहून जाहिरात फलक हटविण्यासाठी दोन दिवसांची मुदत दिली होती. मात्र, मुदत संपूनही कोणतीही कार्यवाही न झाल्याने अखेर मनपाच्या अतिक्रमण विभागाने संबंधित फलक हटविण्याची कारवाई केली.
नव्या आयुक्तांच्या कारवाईचे स्वागत
या कारवाईनंतर ॲड. पियुष पाटील यांनी नव्याने रुजू झालेल्या महानगरपालिका आयुक्तांच्या कार्यपद्धतीचे स्वागत केले. जळगाव शहरात अनधिकृत जाहिराती, मोठे फलक आणि डिव्हायडरच्या नावाखाली झालेल्या जाहिरातींमुळे शहराचे विद्रूपीकरण होत असल्याचे त्यांनी सांगितले. “आयुक्तांनी अत्यंत पारदर्शक आणि कायदेशीर पद्धतीने कारवाई केली असून त्यांचे अभिनंदन करतो,” अशी प्रतिक्रिया त्यांनी दिली.
