जळगाव : प्रतिनिधी
तक्रारदाराचा विश्वास संपादन करत नफ्याचे अमिष दाखवित 30 वषय तरुणाला सायबर ठगाने 97 लाख 50 हजार रुपयांचा ऑनलाईन गंडा घातला. फसवणूक झाल्याची खात्री झाल्याने तक्रारीनुसार याप्रकरणी सायबर पोलीस ठाण्यात गुन्हा दाखल करण्यात आला.
तक्रारदार तरुण बुलढाणा जिल्ह्यातील रहिवासी असुन खाजगी नोकरीनिमित्त ते भुसावळ येथे वास्तव्यास आहेत. गुरुवारी दि.२५ जून रोजी वेळोवेळी विलास पाटील नाव सांगणारा मोबाईल धारक याने तरुणाशी संपर्क साधला. मोबाइल क्रमांकावर नाव व फोटो लावुन त्याने तक्रारदार यांचा विश्वास संपादन केला. नफ्याचा गुंतवणूक फंडा सांगत त्याने तक्रारदार यांच्याकडून तब्बल ९७ लाख ५० हजार रुपये ऑनलाईन स्विकारले. त्यानंतर तक्रारदार यांनी संपर्क साधला असता प्रतिसाद मिळाला नाही. मुळ रक्कमही मिळाली नाही. फसवणूक केल्याची खात्री झाल्याने तक्रारदार यांनी सायबर पोलीस ठाण्यात कैफियत मांडली. त्यानुसार संशयिताविरोधात ऑनलाईन फसवणूक केल्याचा गुन्हा दाखल करण्यात आला. पोलीस निरीक्षक प्रदीप ठाकुर हे तपास करीत आहेत.
