जळगाव : प्रतिनिधी
शॉर्टसर्कीटमुळे चटई कंपनीच्या गोडावूनला आग लागली. काही वेळातच आगीने रौद्ररुप धारण करीत आजूबाजूच्या तीन कंपन्यांना देखील विळख्यात घेतले. या आगीमुळे एका कंपनीतील पाच गॅस सिलींडरचा स्फोट झाल्यामुळे संपुर्ण परिसर हादरुन गेला होता. यामध्ये कंपनीत तयार झालेल्या मालासह मशिनरी जळून खाक झाले. आग ही चौथ्या कंपनी पर्यंत पोहचणार त्यापुर्वीच नियंत्रण मिळविल्यामुळे ती कंपनी सुरक्षीत राहीली. ज्याठिकाणी ही आग लागली त्याच्या समोर गॅस सिलींडरचे गोदाम आहे. आग लागल्यानंतर सिलींडरचा स्फोट झाल्यामुळे परिसरात खळबळ माजून गेली. परंतू कर्मचाऱ्यांनी प्रसंगावधान राखत गॅस गोडावूनच्या बाहेर असलेल्या वाहने तात्काळ तेथून दूर अंतरावर नेवून उभी केली. ही घटना शनिवार दि. २ मे रोजी दुपारी साडेचार वाजेच्या सुमारास जे सेक्टरमध्ये घडली. कंपन्यांना सुटी असल्यामुळे सुदैवाने कंपनीत कामगार नव्हते. त्यामुळे कोणालाही दुखापत झाली नाही.
मिळालेल्या माहितीनुसार, शहरातील एमआयडीसी परिसरातील जे ४० सेक्टरमध्ये दिग्विजय बनवट यांच्या मालकिची नवकार चटई नावाची कंपनी असून त्याच्या शेजारी त्यांनी भाडेतत्वावर तयार झालेला माल ठेवण्याकरीता गोदाम घेतले आहे. शनिवारी दुपारच्या सुमारास अचानक शॉर्टसर्कीटमुळे गोदामाला आग लागली. काही वेळातच आगीने रौद्ररुप धारण केल्यानंतर आगीने शेजारी असलेल्या पावडर कोटींग करणाऱ्या कंपनीला आगीच्या विळख्यात घेतले. त्यामुळे याठिकाणी असलेले गॅस सिलींडरचा स्फोट झाला एकापाठोपाठ एक असे एकूण पाच सिलींडरचा स्फोट झाल्यामुळे आगीच्या ज्वाला आणि धूराचे लोळ उंचच उंच आकाश उडत होते.
जे बदर्स कंपनीच्या समोरच भारत गॅस कंपनीचे गोदाम असून याठिकाणी सीलीडरमध्ये गॅस भरला जातो, गॅस भरण्याकरीता कंपनीसमासेर पाच ते सहा वाहने उभी होती. आगी लागल्यानंतर सिलींडरचा स्फोट झाल्याचे सकजताच वाहन चालकांनी तात्काळ प्रसंगावधना राखत गॅस सीलींडर असलेली वाहने घटनास्थळापासून इतरत्र हलवली. गॅस प्लांटसमोरच ही आगीच्या ज्वाळा आकाशत उठत असल्यामुळे परिसरात भितीचे वातावरण निर्माण झाले होते.
