वरणगाव : प्रतिनिधी
काळबांडे वाड्यातील रहिवासी ज्ञानेश्वर प्रभाकर गव्हाणकर यांच्या मुलीचे लग्न निश्चीत झाले. दोन्ही घरात आनंदाचे वातावरण असताना लग्नाच्या दिवशीच दि. १ मे रोजी सकाळी मुलीचे काका सदाशिव प्रभाकर गव्हाणकर (माळी) (५२) यांचे हृदयविकाराने निधन झाले.
मिळालेल्या माहितीनुसार, अनेक दिवसांपासून गव्हाणकर परिवारात लग्नाची जोरदार तयारी सुरू होती. आपल्या पुतणीच्या लग्नासाठी सदाशिव प्रभाकर गव्हाणकर (माळी) (५२) हे हळदीचा कार्यक्रम आटोपल्यानंतर सदाशिव हे लवकर झोपी गेले. मात्र, दुसऱ्या दिवशी सकाळी ते उठलेच नाहीत.
झोपेत हृदयविकाराने त्यांचा मृत्यू झाला. लग्न मंडपातील आनंदाचे वातावरण पूर्णपणे विरून गेले. लग्नाचाच दिवस असल्याने आधी मोजक्या मंडळीच्या उपस्थितीत साधेपणाने लग्न लावण्यात आले. त्यानंतर सायंकाळी सात वाजता अंत्यसंस्कार करण्यात आले.
