मुंबई : वृत्तसंस्था
भारतीय चित्रपटसृष्टीतील सुवर्णकाळ गाजवणाऱ्या आणि आपल्या बहुआयामी गायकीने लाखो रसिकांच्या मनावर अधिराज्य गाजवणाऱ्या ज्येष्ठ पार्श्वगायिका आशा भोसले यांचे रविवारी दुपारी निधन झाले. त्या ९२ वर्षांच्या होत्या. मुंबईतील ब्रीच कँडी रुग्णालयात येथे त्यांनी अखेरचा श्वास घेतला.
मिळालेल्या माहितीनुसार, शनिवारी संध्याकाळी त्यांची प्रकृती खालावल्याने त्यांना रुग्णालयात दाखल करण्यात आले होते. मात्र, उपचारादरम्यान त्यांची प्रकृती अधिकच गंभीर झाली. रुग्णालयाचे डॉ. प्रतीक समदानी यांनी वृत्तसंस्थेला दिलेल्या माहितीनुसार, आशा भोसले या अनेक वैद्यकीय समस्यांनी त्रस्त होत्या. मल्टी-ऑर्गन फेल्युअरमुळे त्यांच्या अनेक अवयवांनी कार्य करणे बंद केले आणि त्यातच त्यांची प्राणज्योत मालवली. आशा भोसले यांनी आपल्या सात दशकांहून अधिक काळाच्या कारकिर्दीत हिंदीसह मराठी, बंगाली, गुजराती, तमिळ, तेलुगू अशा विविध भाषांमध्ये हजारो गाणी गाऊन रसिकांना मंत्रमुग्ध केले. त्यांच्या आवाजातील बहुरंगीपणा, लयबद्धता आणि भावस्पर्शी सादरीकरणामुळे त्या भारतीय संगीतविश्वातील एक अद्वितीय व्यक्तिमत्त्व ठरल्या.
त्यांच्या निधनाने संगीतविश्वावर शोककळा पसरली असून देशभरातून कलाकार, राजकीय नेते आणि चाहत्यांकडून शोक व्यक्त केला जात आहे. दरम्यान, त्यांचे पुत्र आनंद भोसले यांनी दिलेल्या माहितीनुसार, ज्यांना अंत्यदर्शन घ्यायचे आहे त्यांनी उद्या सकाळी ११ वाजता त्यांच्या निवासस्थानी उपस्थित राहावे. तसेच उद्या दुपारी ४ वाजता मुंबईतील शिवाजी पार्क येथे त्यांच्यावर अंत्यसंस्कार करण्यात येणार आहेत. भारतीय संगीतविश्वातील एक तेजस्वी तारा आज मावळला असून, त्यांच्या सुरेल आवाजाच्या आठवणी कायमच रसिकांच्या मनात जिवंत राहणार आहेत.
