धरणगांव : प्रतिनिधी
पथराड रस्त्यावर झालेल्या अपघात अज्ञात वाहनाने एका दुचाकी स्वारास धडक दिल्याने त्यांचा जागीच मृत्यू झाल्याची घटना घडली.
नांदेड साळवा येथे असलेल्या भागवत सप्ताहाचा कार्यक्रम आटोपून सतीश काशिनाथ जोशी (वय ७५) हे जळगाव येथील आपल्या मुलीकडे दुचाकी (एमएच-१९, एव्हि – ४०४५) ने जात होते. पथराड रस्त्यावर असलेल्या पाटाजवळ एका अज्ञात वाहनाने त्यांचा दुचाकीला धडक दिल्याने ते खाली पडले.
या अपघातात त्यांचा जागीच मृत्यू झाला. घटनेची माहिती मिळताच पाळधी पोलीस चौकीचे स.पो.नि. प्रशांत कंडारे हे त्यांचा सहकाऱ्यांसह घटनास्थळी दाखल झाले. त्यांनी त्यांना जळगाव जिल्हा रुग्णालयात दाखल केले. दरम्यान, या वेळी त्यांच्या खिशात असलेल्या पाकिटात १५ हजार रुपये होते, ते त्यांचा पुतण्याचा ताब्यात देण्यात आले. या वेळी तेथे उपस्थित असलेल्या नागरिकांनी त्यांना भरधाव डंपरने चिरडल्याची चर्चा होती, असे सांगितले. याबाबत पाळधी पोलिसांत गुन्ह्याची नोंद करण्याचे काम सुरू असून तपास पाळधी पोलीस करत आहेत.
