नाशिक : वृत्तसंस्था
भोंदू अशोक खरात प्रकरणाच्या चौकशीसाठी तयार केलेल्या विशेष तपास पथकाने (एसआयटी) राज्य महिला आयोगाच्या माजी अध्यक्षा रुपाली चाकणकर यांना समन्स बजावले आहे. या समन्सनंतर रुपाली चाकणकर यांच्यावर चौकशी होईल, आणि त्यानंतर अटकेची टांगती तलवार उभी राहण्याची शक्यता आहे, अशी चर्चा सत्ताधारी राष्ट्रवादी काँग्रेसच्या नेत्या रुपाली ठोंबरे पाटील यांनी केली आहे.
रुपाली चाकणकर यांनी अशोक खरातशी असणाऱ्या कथित संबंधांमुळे राज्य महिला आयोगाचे अध्यक्षपद आणि नंतर राष्ट्रवादीच्या महिला प्रदेशाध्यक्षपदावरून राजीनामा दिला होता. या प्रकरणात शिवसेना उपनेते सुषमा अंधारे आणि राष्ट्रवादीच्या रुपाली ठोंबरे पाटील यांनी पोलिसांशी भेट घेऊन रुपाली चाकणकर यांच्यावर गुन्हा दाखल करण्याची मागणी केली होती.
टीव्ही 9च्या वृत्तानुसार, रुपाली चाकणकर यांना भोंदू अशोक खरातच्या शिवनिका संस्थान, मिरगाव या ट्रस्टवर सदस्य असल्यामुळे समन्स बजावण्यात आले आहे. या प्रकरणी ट्रस्टच्या सर्व आजी-माजी सदस्यांची चौकशी केली जाणार आहे.
भाजपचे ज्येष्ठ नेते व महसूल मंत्री चंद्रशेखर बावनकुळे यांनी यावर प्रतिक्रिया देताना सांगितले की, “समन्स बजावला आहे, म्हणजे काही आकाश कोसळले नाही; तो चौकशीचा भाग आहे.”
राष्ट्रवादीच्या रुपाली ठोंबरे पाटील यांनी म्हटले की, रुपाली चाकणकर कायद्याने या प्रकरणात सहआरोपी आहेत. त्यांनी ट्रस्टवर होणारा प्रत्यक्ष हितसंबंध, पोलिसांवर टाकलेला दबाव आणि आयोगाच्या अध्यक्षा म्हणून सहभाग लक्षात घेतला पाहिजे.
