भडगाव : प्रतिनिधी
सततच्या तक्रारी आणि गुन्ह्यांच्या तपासात निष्काळजीपणा केल्याचा ठपका ठेवत भडगाव पोलिस ठाण्याचे प्रभारी पोलिस निरीक्षक महेश शर्मा यांची तात्काळ उचलबांगडी करण्यात आली आहे. त्यांना पोलीस मुख्यालयातील नियंत्रण कक्षात हजर राहण्याचे आदेश पोलीस अधीक्षक डॉ. महेश्वर रेड्डी यांनी दिले आहेत.
मिळालेल्या माहितीनुसार, निरीक्षक शर्मा यांच्या कामकाजाबाबत अनेक तक्रारी वरिष्ठांकडे प्राप्त झाल्या होत्या. विशेषतः दाखल गुन्ह्यांमध्ये संशयित आरोपींना अटक करण्यात झालेली दिरंगाई, तसेच पोलिस ठाण्यातील लूज सुपरविजन याबाबत गंभीर आक्षेप नोंदवण्यात आले होते. या पार्श्वभूमीवर कारवाई करत त्यांची तत्काळ बदली करण्यात आली.
यापूर्वीही निरीक्षक महेश शर्मा वादाच्या भोवऱ्यात सापडले होते. जळगाव तालुका पोलिस ठाण्याचे प्रभारी असताना पाणीपुरवठा पाइप चोरी प्रकरणात त्यांच्याविरोधात विधानसभेत तक्रार झाल्यानंतर त्यांची उचलबांगडी करण्यात आली होती. त्यामुळे ही कारवाई त्यांच्या कारकिर्दीतील दुसरी मोठी प्रशासकीय कारवाई ठरली आहे.
दरम्यान, भडगाव येथे दोन दिवसांपूर्वी एम.डी. (मेफेड्रोन) ड्रग्ज प्रकरणात एका दाम्पत्याला अटक करण्यात आली होती. पोलिस ठाण्याच्या अवघ्या शंभर मीटर अंतरावर बसस्थानक परिसरात अवैध धंदे आणि गुन्हेगारी हालचाली सुरू असल्याच्या तक्रारी स्थानिकांकडून वारंवार केल्या जात होत्या. या पार्श्वभूमीवर निरीक्षक शर्मा यांच्यावर कारवाई झाल्याची चर्चा तालुक्यात रंगली होती.
मात्र, वरिष्ठ पोलिस अधिकाऱ्यांनी ड्रग्ज प्रकरणाशी या बदलीचा थेट संबंध नसल्याचे स्पष्ट केले आहे. तरीही, वाढत्या तक्रारी आणि कामकाजातील त्रुटींमुळेच ही कारवाई करण्यात आल्याचे सांगितले जात आहे. या घटनेमुळे पोलिस दलात खळबळ उडाली असून, प्रशासनाकडून निष्काळजीपणावर कठोर भूमिका घेतली जात असल्याचा संदेशही यातून देण्यात आला आहे.
