अमळनेर : प्रतिनिधी
भरदिवसा व्यापाऱ्याच्या डोळ्यात मिरचीपुड फेकून त्यांच्याजवळील ५ लाख २७ हजारांची बॅग लुटणाऱ्या सराईत गुन्हेगार मनोज खुशाल उर्फ अशोक मोकळ (वय २६, रा. दंडेवाला नगर, मोहाडी, ता. धुळे) याला स्थानिक गुन्हे शाखेच्या पथकाने अटक केली. त्याच्या अन्य दोघ साथीदारांचा पोलिसांकडून कसून शोध घेतला जात आहे.
अमळनेर येथील लामा जिनिंगचे मालक यतीन विनोद कोठारी (वय ४८) हे दि. २५ फेब्रुवारी रोजी दुचाकीने जिनिंगमध्ये जात होते. पिंपळे रोडवर मोटारसायलवरुन आलेल्या तिघांनी त्यांना अडवून त्यांच्या डोळ्यात मिरची पुड टाकली, आणि त्याच्याजवळ असलेली ५ लाख २७हजार रुपयांची रोकड असलेली बॅग हिसकावून ते पसार झाले. याप्रकरणी गुन्हा दाखल करण्यात आला होता. या घटनेचे गांभीर्य लक्षात घेत पोलीस अधीक्षक डॉ. महेश्वर रेड्डी यांनी गुन्ह्याचा समांतर तपास करण्याच्या सूचना दिल्या. त्यानुसार एलसीबीचे पोलीस निरीक्षक राहुल गायकवाड यांच्या मार्गदर्शनाखाली उपनिरीक्षक जितेंद्र वाल्टे यांच्या पथकाने हा तपास सुरु आहे.
तांत्रिक विश्लेषणाच्या आधारावर हा गुन्हा धुळे येथील सराईत गुन्हेगार मनोज उर्फ खुशाल मोकळ याने त्याच्या साथीदारांच्या मदतीने केल्याची माहिती पथकाला मिळाली. त्यानुसार पोलिसांनी सापळा रचून संशयित मोकळ याला ताब्यात घेतले. त्याची कसून चौकशी केली असता, त्याने गुन्ह्याची कबुली देत दीड लाखांची रोकड काढून दिली.
