यावल : प्रतिनिधी
चिंचोली बसस्थानकाजवळ १८ रोजी सायंकाळी ७.३० वाजेच्या सुमारास दोन दुचाकींची समोरासमोर धडक झाली. या अपघातात दोन्ही दुचाकींवरील बालकासह ५ जण जखमी झाल्याची घटना घडली. जखमींना तातडीने जळगाव येथील रूग्णालयात उपचारासाठी दाखल करण्यात आले आहे.
मिळालेल्या माहितीनुसार, चिंचोली येथील प्रमोद प्रकाश साळुंखे हे आपली पत्नी जयमाला साळुंखे व मुलगा प्रिन्स साळुंखे (वय २ वर्षे) यांच्यासह आपल्या दुचाकीवरून चिंचोली पेट्रोल पंपाकडून चिंचोली गावात जात होते. तर चोपडा शहराकडून किनगावकडे चोपडा तालुक्यातील पारगाव येथील भावेश गणेश पाटील व कपिल विकास कोळी हे पल्सर गाडी (एमएच १९, बीव्ही- ९५५५) ने जात होते. चिंचोली बसस्थानकाजवळ या दोन्ही दुचाकी एकमेकांवर समारासमोर धडकल्या.
या अपघातात चिंचोली येथील प्रमोद साळुंखे, जयमाला साळुंखे व प्रिन्स साळुंखे यांच्यासह पारगाव येथील भावेश पाटील व कपिल कोळी हे पाचही जण गंभीर जखमी झालेत. जखमींना तातडीने जळगाव येथील रूग्णालयात उपचारासाठी दाखल करण्यात आले आहे. दरम्यान, यावल पोलीस स्टेशनचे पोलीस कर्मचारी किशोर परदेशी व होमगार्ड संजय साळुंखे हे कर्तव्य बजावत होते, त्यामुळे ५ मिनिटांतच घटनास्थळी दाखल झाले. त्यानंतर अनिल सोळुंके व दोन्ही पोलीस कर्मचाऱ्यांनी जखमींना तत्काळ खासगी वाहनाने जळगाव येथे उपचारार्थ रवाना करण्यास सहकार्य केले.
