मुंबई : वृत्तसंस्था
मुंबई महापालिकेची निवडणूक काँग्रेस स्वबळावर लढविणार असल्याची अधिकृत घोषणा प्रदेश काँग्रेसचे प्रभारी रमेश चेन्नीथला यांनी शनिवारी केली. या निर्णयाने मुंबईतील महाविकास आघाडीत त cracks तडे पडले असून, आता ठाकरेंची शिवसेना, शरद पवार गटाची राष्ट्रवादी काँग्रेस आणि मनसे हेच पक्ष आघाडीत उरले आहेत. त्यामुळे आगामी महापालिका निवडणुकीत महायुती विरुद्ध महाविकास आघाडी विरुद्ध काँग्रेस अशी तिरंगी लढत पाहायला मिळणार आहे.
प्रदेश काँग्रेस तसेच मुंबई काँग्रेसमधील अनेक नेते—विशेषतः प्रदेशाध्यक्ष हर्षवर्धन सपकाळ—मुंबई महापालिका निवडणूक स्वबळावर लढवण्याचा सातत्याने आग्रह धरत होते. त्यानुसार पाठविण्यात आलेल्या प्रस्तावाला पक्षश्रेष्ठींनी अखेर हिरवा कंदील दिला असल्याचे चेन्नीथला यांनी जाहीर केले.
मुंबई काँग्रेसच्या अध्यक्षा व खासदार वर्षा गायकवाड यांनी, “हुकूमशाही वृत्ती असलेल्या पक्षांसोबत आघाडी करण्याचा प्रश्न नाही. मुंबई ही सर्वांची आहे. परप्रांतीयांवर मारहाण करणाऱ्या राजकारणाला काँग्रेस मान्यता देणार नाही. त्यामुळे काँग्रेस स्वबळावरच निवडणूक लढवेल,” असे स्पष्ट करत अप्रत्यक्षपणे मनसेवर निशाणा साधला.
काँग्रेस नेते बाळासाहेब थोरात यांनी, “मुंबई महापालिकेत काँग्रेसचा महापौर बसविण्याचा आमचा निर्धार आहे,” असे सांगितले. तर आमदार अस्लम शेख यांनी, “या निर्णयामुळे कार्यकर्त्यांना निवडणूक लढविण्याची मोठी संधी मिळेल,” असे मत व्यक्त केले.
मुंबईत गेल्या काही वर्षांत काँग्रेसचा प्रभाव कमी झाल्याचे वास्तव लपलेले नाही. 2017 च्या निवडणुकीत काँग्रेसचे 31 नगरसेवक निवडून आले होते. पारंपरिकरीत्या मुंबई महापालिकेत पक्षाचे संख्याबळ 30 ते 40 या दरम्यान राहिले आहे. मात्र राष्ट्रवादी काँग्रेससोबतची आघाडी तुटल्याने धर्मनिरपेक्ष मतांचे विभाजन होण्याची शक्यता निर्माण झाली आहे. अशा परिस्थितीत काँग्रेस किती जागा राखू शकेल, याकडे सर्वांचे लक्ष लागले आहे.
