भुसावळ : प्रतिनिधी
शहरातील एका लॉजमध्ये थांबलेल्या दोन बांगलादेशी महिलांना पोलिसांनी अटक केल्यानंतर खळबळ उडाली होती. या प्रकरणात पोलिसांनी पुणे येथून दोघांना अटक केली असून, न्यायालयाने त्यांना ३१ मेपर्यंत पोलिस कोठडी सुनावली आहे.
सविस्तर वृत्त असे कि, मूळच्या बांगलादेशातील दोन तरुणी दिल्लीहून मुंबईकडे जाण्यासाठी निघाल्या होत्या. प्रवासादरम्यान त्या भुसावळमधील एका लॉजमध्ये थांबल्या. त्यांनी लॉजमध्ये दाखवलेले आधार कार्ड हे संशयास्पद वाटल्याने लॉज व्यवस्थापकाने पोलिसांना याची माहिती दिली. बाजारपेठ पोलिस स्टेशनच्या पथकाने तत्काळ कारवाई करत दोन्ही महिलांना ताब्यात घेतले. तपासात आधार कार्ड बनावट असल्याचे स्पष्ट झाले. याप्रकरणी गुन्हा दाखल करण्यात आला. तपासात पोलिसांनी पुणे येथून रंगा देवअप्पा अरकरी (वय ४५) व कुलमणी रंगा अरकरी (३६) या दोघांना अटक केली आहे. पोलिसांनी सांगितले की, हे पती-पत्नी असून पत्नी पश्चिम बंगालची व पती कर्नाटकचा रहिवासी आहे.
गुरुवारी या दोघांना न्यायालयात हजर केले असता, न्यायालयाने त्यांना ३१ मेपर्यंत पोलिस कोठडी सुनावली. पुढील तपास सहायक पोलिस निरीक्षक अमितकुमार बागुल करीत आहेत. बांगलादेशी महिला भुसावळात थांबल्याचे समोर आल्यानंतर या प्रकरणी सखोल तपास सुरु आहे.
