जळगाव : प्रतिनिधी
कंपनीमधून घरी परतण्यासाठी बसमध्ये चढणाऱ्या तरुणीच्या खिशातून मोबाइल काढून पळ काढणारा चोरटा नागरिकांच्या सतर्कतेमुळे पोलिसांच्या जाळ्यात अडकला. मोबाइल चोरल्यानंतर चोरटा ज्या रिक्षात बसला, त्या रिक्षाला घेराव घातल्याने चोरी फसली. ही घटना शुक्रवारी (६ सप्टेंबर) रोजी आकाशवाणी चौकानजीक घडली. याप्रकरणी अर्षद शेख रईस (२१, रा. तांबापुरा) याला अटक केली आहे.
मिळालेल्या माहितीनुसार, धरणगाव तालुक्यातील चोरगाव येथील एक तरुणी जळगावात कंपनीमध्ये नोकरीला आहे. शुक्रवारी संध्याकाळी ती घरी जाण्यासाठी आकाशवाणी चौकात एका बसमध्ये चढत असताना तिच्या खिशातून एकाने मोबाइल चोरला. मोबाइल काढल्याचे समजताच तरुणीने आरडाओरडा केला. त्यावेळी हा चोरटा एका रिक्षात बसून पळ काढणार तितक्यात नागरिकांनी रिक्षाला घेराव घातला व त्याला लोकांनी मार दिला. त्यावेळी त्याने मोबाइल बाजूला फेकला व तो सदर तरुणीच्या हाती लागला. याप्रकरणी तरुणीने रामानंदनगर पोलिस ठाण्यात फिर्याद दिली. त्यावरून अर्षद शेख रईस याच्याविरुद्ध गुन्हा दाखल करण्यात आला असून, त्याला अटक करण्यात आली आहे. पुढील तपास पोलिस नाईक हेमंत कळसकर करीत आहेत.
