जळगाव प्रतिनिधी । शहरातील गोलाणी मार्केट येथील नेत्रम ऑप्टिकल्स समोरून एकाची दुचाकी अज्ञात चोरट्याने चोरून नेल्याची घटना १९ मे रोजी दुपारी १ वाजता घडली आहे. याप्रकरणी शुक्रवारी २४ मे रोजी दुपारी १२ वाजता जळगाव शहर पोलिसात गुन्हा दाखल करण्यात आला.
नंदू महारु भोई वय-४३, रा. शिवशंकर कॉलनी, जळगाव हे आपल्या परिवारासह वास्तव्याला आहे. ते गोलाणी मार्केट जवळील नेत्रम ऑप्टिकल समोर मुरमुरे शेव विक्री करण्याचा व्यवसाय करून आपला उदरनिर्वाह करत असतात. नेहमीप्रमाणे १९ मे रोजी दुपारी १ वाजता त्यांनी त्यांची दुचाकी (एमएच १९ बीआर ५९४६) दुकानासमोर लावली होती. त्यावेळी अज्ञात चोरट्याने ही दुचाकी चोरून नेली. दरम्यान दुचाकी चोरी झाल्याचे लक्षात आल्यानंतर त्यांनी दुचाकीचा सर्वत्र शोध घेतला. परंतु दुचाकीबाबत कोणतेही माहिती मिळाली नाही. अखेर त्यांनी शुक्रवारी २४ मे रोजी दुपारी १२ वाजता शहर पोलिसात धाव घेऊन तक्रार दिली. त्यानुसार अज्ञात चोरट्याने विरोधात गुन्हा दाखल करण्यात आला आहे.
