भुसावळ : प्रतिनिधी
तालुक्यातील यावल शहराजवळ चोपडा रस्त्यावर ट्रकवर ताडपत्रीचा दोर बांधताना तोल जाऊन पडल्याने चालक जागीच ठार झाला. ही दुर्घटना रविवारी रात्री नऊ वाजता घडली. घटनेची माहिती मिळताच पोलिस पथक घटनास्थळी दाखल झाले. मयत चालकाचा मृतदेह यावल ग्रामीण रुग्णालयात आणण्यात आला, मयताचे नाव संतोष रामसिंग भूरिया असे आहे. तो मध्य प्रदेशातील इंदूर येथील रहिवासी आहे. त्याच्या कुटुंबीयांना माहिती देण्यात आली आहे.
यावल शहराबाहेर चोपडा रस्त्यावर महाजन पेट्रोल पंपाजवळ संतोष हा ट्रकवरील ताडपत्रीला दोर बांधत असताना त्याचा तोल गेला. रस्त्यावर कोसळून त्याच्या डोक्याला जबर दुखापत होऊन तो जागीच ठार झाला. या दुर्घटनेची माहिती आरडाओरड करून ट्रक वरील क्लीनर उपेंद्र राजकुमार चव्हाण याने नागरिकांना दिली. घटनास्थळी अयाज खान, इम्तियाज शेख आदींसह नागरिक दाखल झाले व त्यांनी पोलिसांना माहिती दिली.
