भुसावळ : प्रतिनिधी
महामार्गावर उभ्या असलेल्या ओव्हरलोड बल्करला (पावडर वाहून नेणारे ट्रक) कारने मागून धडक दिली. समोरून येत असलेल्या कुत्र्याला वाचवण्याच्या प्रयत्नात कार थेट बल्करवर जाऊन आदळली. त्यात कारमधील तीनजण गंभीर जखमी झाले, तर कुत्राही चिरडला गेला आहे. ही घटना मंगळवारी दुपारी घडली.
मिळालेल्या माहितीनुसार, वरणगाव येथून जळगावच्या दिशेने कार (क्र. एमएच ०४ सीटी ८६१०) जात होती. यावेळी महामार्गावर अचानक कारसमोर कुत्रा पळत आला. त्या कुत्र्याला वाचवण्याच्या प्रयत्नात कार महामार्गावर उभ्या करून ठेवलेल्या राखेच्या बल्करवर जाऊन आदळली. या अपघातात आवेश शेख (२४, रा. १५ बंगला भुसावळ), रोशन महेकर (२२) आणि मयांक महेकर (२४) हे तिघे जखमी झाले आहेत. त्यांना उपचारार्थ जळगाव येथील खासगी रुग्णालयात दाखल करण्यात आले आहे.
