धरणगाव : प्रतिनिधी
एका गावातून अल्पवयीन मुलीला फूस लावून पळवून नेत तिच्यावर वेगवेगळ्या ठिकाणी अत्याचार करण्यात आला. या गुन्ह्यातील आरोपी व पीडित मुलीला पोलिसांनी शिर्डी येथून ताब्यात घेतले. संशयिताला जिल्हा न्यायालयात हजर केले असता न्यायालयाने दि. ३० जुलैपर्यंत पोलिस कोठडी सुनावली. समाधान दंगल पाटील (२५) असे अटकेतील संशयिताचे नाव आहे. धरणगाव तालुक्यातील एका गावात १६ वर्षीय अल्पवयीन मुलगी ही आपल्या परिवारासह वास्तव्याला आहे. समाधान पाटील याने दि. ५ जुलै रोजी रात्री ११ वाजता पीडित मुलीला फूस लावून दुचाकीने पळवून नेले. त्यानंतर चोपडा येथून लक्झरीने सुरत येथे गेले. तिथे नातेवाइकांकडे १० ते १२ दिवस राहिल्यानंतर समाधान पाटील याने मुलीला लक्झरीने शिर्डी येथे घेऊन गेला. त्या ठिकाणी एका झोपडीत राहून तिच्यावर अत्याचार केला.
दि. २५ जुलै रोजी दोघे शिर्डी बसस्थानकात असताना शिर्डी पोलिसांनी दोघांना ताब्यात घेतले. त्यानंतर दोघांना धरणगाव पोलिसांच्या ताब्यात देण्यात आले. याप्रकरणी गुन्हा दाखल करण्यात आला. आरोपी समाधान पाटील याला जिल्हा व सत्र न्यायालयाने दि. ३० जुलैपर्यंत पोलिस कोठडी सुनावली.
