जळगाव : प्रतिनिधी
तिसऱ्या मजल्यावर बांधकामाची परवानगी मिळाल्याची खोटे व बनावट कागदपत्रे देण्यासह ताबा दिलेल्या जागेचा परस्पर इतरांशी व्यवहार करत हॉटेल व्यावसायिक व इस्टेट ब्रोकर सुरेश नंदलाल तलरेजा (६३, रा. गणपती नगर) यांची ३ कोटी ७२ लाख रुपयांमध्ये फसवणूक करण्यात आली. हा प्रकार सन २०२१पासून सुरू होता. या प्रकरणी रविवारी (दि. ६ सप्टेंबर) के.पी. इन्फ्रास्ट्रक्चर व त्याचे प्रोप्रायटर, ममता अनिल साहित्या अनिल खूबचंद साहित्या, खुबचंद प्रेमचंद साहित्या, नितीन खूबचंद साहित्या (सर्व रा. मोहाडी रोड), जयराम इन्फ्रास्ट्रक्चर प्रोजेक्ट्स प्रा. लि. व विशाल रामगोपाल शर्मा (रा. मुंबई) यांच्याविरुद्ध शहर पोलिस ठाण्यात फसवणुकीचा गुन्हा दाखल झाला आहे.
या संदर्भात तलरेजा यांनी शहर पोलिस ठाण्यात दिलेल्या फिर्यादीत म्हटले आहे की, साहित्या कुटुंबियांनी त्यांना संत बाबा हरदासराम शॉपिंग कॉम्प्लेक्स या व्यापारी संकुलाच्या तिसऱ्या मजल्यावरील बांधकामाविषयीचे महापालिका अधिकाऱ्यांच्या सही व शिक्का असलेली कागदपत्रे दाखवून त्यांच्याकडून रोख व बँक व्यवहारांद्वारे रक्कम स्वीकारली. सुरुवातीला सौदापावती व नंतर लेखी ताबा पावती देत प्रत्यक्ष जागेचा ताबा दिला. तेथे तलरेजा यांनी इस्टेट ब्रोकरचे कार्यालय व रीडिंग रूम सुरू करून त्यासाठी मोठा खर्च केला.
या प्रकरणी सुरेश तलरेजा यांनी शहर पोलिस ठाण्यात फिर्याद दिली.
त्यावरून के. पी. इन्फ्रास्ट्रक्चर व त्याचे प्रोप्रायटर, ममता साहित्या, अनिल साहित्या, खुबचंद साहित्या, नितीन साहित्या, जयराम इन्फ्रास्ट्रक्चर प्रोजेक्टस प्रा. लि. व विशाल रामगोपाल शर्मा यांच्याविरुद्ध गुन्हा दाखल करण्यात आला आहे. तलरेजा यांच्याकडे ताबा असलेल्या मिळकतीचा परस्पर इतरांशी व्यवहार झाल्याचे त्यांना जुलै २०२६ मध्ये समजले. त्यामुळे त्यांनी महापालिकेत चौकशी केली असता संबंधित व्यापारी संकुलाच्या तिसऱ्या मजल्यापर्यंत बांधकामाला परवानगी नसल्याचे समोर आले.
