यावल : प्रतनिधी
तालुक्यातील चिंचोली येथील पेट्रोल पंपावर तरूणांचा आपसात वाद झाला. त्यात एकास मारहाण तर एकास शिविगाळ करण्यात आली. डायल ११२ वर कॉल केल्याने घटनास्थळी आलेल्या पोलिसांनी संबधीत शिवीगाळ करणाऱ्यांना अटक का केली नाही. या रागातून एकाने पोलिस ठाण्यात येवून अंगावर पेट्रोल ओतून आत्मदहनाचा प्रयत्न केला. ही घटना सोमवारी दि. २४ रोजी घडली. याप्रकरणी तरूणाच्या तक्रारीवरून एका विरूध्द तसेच या तरूणाविरूध्द देखील अदखलपात्र गुन्हा नोंदवण्यात आला आहे.
मिळालेल्या माहितीनुसार चिचोली येथील पेट्रोल पंपावर समाधान धनगर व महेंद्र रूले हे दुचाकीवर गेले होते. तेथे त्यांच्याशी शुभम पाटील याने महेंद्र रूले यास मारहाण केली व समाधान धनगर यास शिवीगाळ केली आणि तुम्हाला बघुन घेईल, अशी धमकी दिली. तेव्हा समाधान धनगर याने डायल ११२ वर कॉल केला व पोलिसांची मदत मागितली. घटनास्थळी पोलिसांचे पथक पोहचले असता तेथुन शुभम पाटील आणि महेंद्र रूले निघुन गेले होते. तर समाधान धनगर यास पथकाने पोलिस ठाण्यात तक्रार देण्यासाठी सोबत चला असे सांगितले असता त्याने तुम्ही शुभमला आत्ताचं अटक करा, असे सांगीतले.
मात्र, आधी तक्रार करा असे पोलिसांनी सांगीतल्याचा राग येवून समाधान पोलिस पथका सोबत न येता त्याच्या दुचाकीवर पोलिस ठाण्यात आला व त्याने अंगावर पेट्रोल टाकून आत्मदहनाचा प्रयत्न केला. पोलिसांनी त्यास वेळीच थांबवले तर या प्रकरणी समाधान याच्या फिर्यादीवरून शुभम पाटील विरूध्द अदखलपात्र गुन्हा नोंदवण्यात आला आहे. समाधानविरूध्द देखील अदखलपात्र गुन्हा दाखल करण्यात आला आहे.
ज्याला मारहाण झाली तो तक्रार देण्यास आला नाही. तर शिविगाळ झाल्याची तक्रार पोलिस ठाण्यात येवून द्यावी लागेल आणि ज्या गुन्ह्यात अटक करण्याचे अधिकार पोलिसांना नाही त्यात अटक करावी. या करीता अंगावर पेट्रोल ओतून धनगर हा पोलिसांना वेढीस धरत आहे, असे पोलीस निरीक्षक रंगनाथ धारबळे यांनी सांगितले.
