जळगाव : प्रतिनिधी
जळगाव-बांभोरी महामार्गावरील शासकीय आयटीआयसमोर गुरुवारी कार आणि कंटेनर यांच्यात झालेल्या अपघातामुळे काही काळ परिसरात खळबळ उडाली. कंटेनरला ओव्हरटेक करण्याच्या प्रयत्नात कार चालकाचे वाहनावरील नियंत्रण सुटल्याने हा अपघात घडल्याची प्राथमिक माहिती समोर आली आहे. सुदैवाने या घटनेत कोणतीही जीवितहानी झाली नसली तरी दोन्ही वाहनांचे नुकसान झाले असून काही काळ वाहतुकीवर परिणाम झाला.
मिळालेल्या माहितीनुसार, जळगावकडून बांभोरीच्या दिशेने (एमएच १९ सीयु १३६७) क्रमांकाची कार जात होती. त्याच मार्गावर पुढे (आरजे ०६ जीई ३९४१) क्रमांकाचा कंटेनरही प्रवास करत होता. शासकीय आयटीआयसमोर कार चालकाने कंटेनरला ओव्हरटेक करण्याचा प्रयत्न केला. मात्र ओव्हरटेक करताना वाहनावरील नियंत्रण बिघडल्याने कारचा कंटेनरला धक्का लागून अपघात झाला. अपघातानंतर दोन्ही वाहने रस्त्यावरच थांबल्याने काही काळ वाहतुकीचा वेग मंदावला. घटनेची माहिती मिळताच परिसरातील नागरिक, वाहनचालक आणि प्रवाशांनी घटनास्थळी गर्दी केली. अपघातामुळे काही काळ वाहतुकीची कोंडी निर्माण झाली होती. मात्र नागरिकांच्या सहकार्याने वाहतूक हळूहळू सुरळीत करण्यात आली. सुदैवाने या अपघातात कोणालाही गंभीर दुखापत झाली नाही. त्यामुळे मोठी दुर्घटना टळल्याची भावना नागरिकांनी व्यक्त केली. वाहनांचे मात्र किरकोळ नुकसान झाल्याचे सांगण्यात आले.
दरम्यान, अपघातानंतर कंटेनर चालक आणि कार चालक यांच्यात शाब्दिक वाद झाला. कंटेनर चालकाने कार चालकाला निष्काळजीपणे ओव्हरटेक करण्याबाबत जाब विचारल्याने काही काळ घटनास्थळी तणावाचे वातावरण निर्माण झाले होते. उपस्थित नागरिकांनी मध्यस्थी करून दोन्ही चालकांना शांत केले.
