चिंतामणी मोरया परिसरात तोंडाला मास्क लावलेले चार संशयित चोरटे कॅमेऱ्यात कैद; नागरिकांमध्ये भीतीचे वातावरण
धरणगाव | प्रतिनिधी
धरणगाव शहरातील चिंतामणी मोरया परिसरात चोरट्यांच्या टोळीची दहशत निर्माण झाली असून तोंडाला मास्क लावलेले चार संशयित चोरटे सीसीटीव्ही कॅमेऱ्यात कैद झाले आहेत. या घटनेमुळे परिसरातील नागरिकांसह संपूर्ण शहरात भीतीचे वातावरण पसरले आहे.
मिळालेल्या माहितीनुसार, पहाटे सुमारे चार वाजेच्या सुमारास चार संशयित चोरटे परिसरात फिरताना दिसून आले. यावेळी एका महिलेच्या निदर्शनास हा प्रकार येताच तिने तत्काळ आरडा-ओरडा केला. त्यामुळे चोरट्यांनी तेथून पळ काढल्याचे सांगण्यात येत आहे.
दरम्यान, चोरट्यांनी चिंतामणी मोरया परिसरातील एका बंद घरासह एका छोट्या दुकानाला लक्ष्य केले. बंद घरातून कोणतीही मौल्यवान वस्तू हाती लागली नसली तरी दुकानातून काही साड्या तसेच अंदाजे चार ते पाच हजार रुपयांची रोकड लंपास केल्याची माहिती समोर आली आहे.
परिसरात संशयित चोरटे फिरत असतानाची संपूर्ण घटना तेथील सीसीटीव्ही कॅमेऱ्यांमध्ये कैद झाली असून फुटेजमध्ये चार जण स्पष्टपणे दिसत आहेत. या घटनेनंतर नागरिकांनी पोलिस प्रशासनाने रात्रीची गस्त वाढवावी, तसेच चोरट्यांचा तातडीने बंदोबस्त करावा, अशी मागणी केली आहे.
सध्या सीसीटीव्ही फुटेजच्या आधारे संशयितांचा शोध घेण्याचे काम सुरू असल्याची माहिती मिळत आहे. पोलिसांकडून या प्रकरणाचा अधिक तपास केला जात आहे.
