अमळनेर : प्रतिनिधी
भरधाव वेगाने जाणाऱ्या वाळूच्या डंपरने रस्त्याने पायी जाणाऱ्या सदरुद्दीन शेख अब्दुल (वय ६५ रा. जोशीपुरा, पिंपळे रोड, अमळनेर) यांना धडक दिली. त्यांच्यावर उपचार सुरु असतांना त्यांचा दि. १३ एप्रिल रोजी दुर्देवी मृत्यू झाला. याप्रकरणी डंपर चालकाविरुद्ध पोलिसात गुन्हा दाखल करण्यात आला आहे.
धुळे रस्त्यावरुन पायी जात असलेल्या सदरुद्दीन शेख अब्दुल या वृद्धाला भरधाव वेगाने जाणाऱ्या (एमएच ४१, बीटी २०२१) या क्रमांकाच्या वाळूच्या डंपरने धडक दिल्याची घटना दि. १२ एप्रिल रोजी सायंकाळच्या सुमारास घडली होती. या अपघातात शेख यांना गंभीर दुखापत झाल्याने रस्त्यावरून उचलत रिक्षात टाकून उपचारासाठी त्यांना अमळनेर शहरातील खासगी रुग्णालयात दाखल करण्यात आले होते. त्यांच्यावर उपचार सुरु असतांना दि. १३ एप्रिल रोजी त्यांचा दुर्देवी मृत्यू झाला. याप्रकरणी अमळनेर पोलिसात डंपर चालक रोशन खराटे याचे विरुद्ध गुन्हा दाखल करण्यात आला.
