भुसावळ : प्रतिनिधी
दीपनगर औष्णिक वीज निर्मिती केंद्रातील ५०० मेगावॅट प्रकल्पात सुरक्षा रक्षक म्हणून कार्यरत असलेल्या एमएसएफ (महाराष्ट्र सुरक्षा दल) जवानाचा हृदयविकाराच्या झटक्याने मृत्यू झाल्याची घटना मंगळवारी सायंकाळी घडली. गणेश बापू दैवत (वय ३१, रा. माहीजी, ता. पाचोरा) हे नियमित वॉकिंगदरम्यान मैदानावर कोसळले आणि त्यांचा मृत्यू झाला.
११ जून २०२५ रोजी गणेश दैवत यांनी ड्युटी पूर्ण करून सायंकाळी मैदानावर फिरण्यासाठी गेले. तेथेच त्यांना हृदयविकाराचा तीव्र झटका आला. ते मैदानावरच कोसळले. त्याचवेळी पावसाला सुरुवात झाली होती. पावसातही उठत नसल्याचे पाहून त्यांच्या सहकाऱ्यांनी जवळ जाऊन पाहणी केली. गणेश यांना भुसावळ येथील खासगी रुग्णालयात दाखल करण्यात आले. डॉक्टरांनी त्यांना मृत घोषित केले. त्यांचा पत्नी, आई-वडील आणि भाऊ असा परिवार आहे.
