जळगाव : प्रतिनिधी
निमखेडी शिवारात आज दि.४ रोजी पहाटेच्या सुमारास एका भीषण अपघातात दोन सख्ख्या भावांचा जागीच मृत्यू झाला. मृतांची नावे ज्ञानेश्वर झगडू शिवदे आणि प्रमोद दगडू शिवदे अशी आहेत.
सविस्तर वृत्त असे कि, दुध फेडरेशन ते निमखेडी रस्त्यावरील जुना हायवे येथे कांताई नेत्रालयाजवळ एका अज्ञात वाहनाने त्यांच्या रिक्षाला जोरदार धडक दिली. या धडकेत दोघेही गंभीर जखमी झाले आणि त्यांचा जागीच मृत्यू झाला. मयत ज्ञानेश्वर शिवदे हे शिवसेना (शिंदे गट) महिला शहरप्रमुख ज्योती शिवदे यांचे पती होते, तर प्रमोद हे त्यांच्या पतीचे बंधू होते. एकाच अपघातात दोन्ही भावांचा मृत्यू झाल्याने शिवदे कुटुंबावर दुःखाचा डोंगर कोसळला आहे.
ज्ञानेश्वर आणि प्रमोद हे दोघेही पाणीपुरी विक्रीचा व्यवसाय करत होते. दररोजप्रमाणे पाणीपुरीचा माल तयार करण्यासाठी ते शिवाजीनगर येथील जुन्या घरी जात असताना हा दुर्दैवी अपघात घडला. अपघातानंतर मृतदेह उत्तरीय तपासणीसाठी जिल्हा शासकीय रुग्णालयात नेण्यात आले. यावेळी नातेवाईकांसह शिवसेना शिंदे गटाचे अनेक कार्यकर्ते रुग्णालयात उपस्थित होते. दरम्यान, अपघातानंतर अज्ञात वाहनचालक फरार झाला असून, पोलिसांनी पुढील तपास सुरू केला आहे. या दुर्घटनेमुळे जळगाव शहरात हळहळ व्यक्त केली जात आहे. शिवसेना शिंदे गटातील कार्यकर्त्यांमध्ये शोककळा पसरली आहे.
