जळगाव : प्रतिनिधी
गुजराल पेट्रोलपंप परिसरातील निवृत्ती नगरातील संकल्पसिध्दी अपार्टमेंटमध्ये एका सेवानिवृत्त शिक्षकाच्या बंद घरातून १८ रोजी चोरट्यांनी ५० हजार रुपये रोख व एक ग्रॅमची अंगठी चोरली होती. या प्रकरणी जिल्हापेठ पोलिस ठाण्यात गुन्हा दाखल होता. अवघ्या ४८ तासांच्या आत स्थानिक गुन्हे शाखेच्या पथकाने या घरफोडीतील संशयिताला ताब्यात घेऊन, चोरीला गेलेला माल हस्तगत केला आहे.
सविस्तर वृत्त असे कि, सेवानिवृत्त शिक्षक अनिल लक्ष्मण सपकाळे हे त्यांच्या आईला भेटण्यास गेले असताना अर्पाटमेंट मधील बंद घराचे कुलूप तोडून रोख रक्कम सोन्याची अंगठी चोरुन नेली होती. या गुन्ह्याच्या तपासादरम्यान स्थानिक गुन्हे शाखेचे पोलिस निरीक्षक बबन आव्हाड यांना सचिन भागवत सपकाळ (रा. मोहाडी, ता. जामनेर) याने ही चोरी केल्याची माहिती मिळाली होती. त्या आधारावर सचिनला गुरुवारी ताब्यात घेऊन, त्याच्याकडून माहिती घेतली असता त्याने आपल्या ३ साथीदारांसोबत चोरी केल्याची कबुली दिली, अशी माहिती पोलिसांनी दिली आहे. त्याच्याकडून ५० हजार रुपयांची रोख रक्कम व १ ग्रॅम सोन्याची अंगठी असा ऐवज हस्तगत करण्यात आला आहे. ही कारवाई पोलिस उपनिरक्षक दत्तात्रय पोटे, विजयसिंग पाटील, अतुल वंजारी, अकरम शेख, महेश महाजन, प्रविण भालेराव, राहुल पाटील, भारत पाटील, महेश सोमवंशी यांनी केली आहे.
