भडगाव : प्रतिनिधी
ट्रॅक्टरच्या ट्रॉलीवर दुचाकी जाऊन आदळल्याने इसमाचा मृत्यू झाल्याची घटना मंगळवारी रात्री ९:३० वाजेच्या सुमारास घडली. बापू सोमनाथ जगताप (५७) असे मयताचे नाव आहे.
मिळालेल्या माहितीनुसार, कजगाव येथील मेन्स पार्लरचे संचालक बापू सोमनाथ जगताप हे मोटरसायकलने व त्यांचे दोन सुपुत्र मुन्ना जगताप व विकी जगताप हे दुसऱ्या दुचाकीने नगरदेवळा येथे आयोजित नातेवाइकांच्या विवाह समारंभासाठी जात होते.
कजगाव-भडगाव मार्गावरील साईबाबा मंदिराच्या पुढे ऊस वाहतूक करणाऱ्या ट्रॅक्टरसह दोन ट्रॉली रस्त्यात उभ्या करून ठेवण्यात आल्या होत्या. समोरून पडणाऱ्या वाहनाच्या प्रकाशामुळे तसेच ट्रॅक्टरला दर्शक अथवा रेडियम नसल्याने ट्रॅक्टर व ट्रॉली दिसून आली नाही. त्यामुळे बापू जगताप यांची दुचाकी ट्रॉलीवर जाऊन आदळली.
या अपघातात जगताप हे गंभीर जखमी झाले. काही अंतरावर असलेले दोन्ही मुलं तेथे पोहचल्यानंतर त्यांना वडिलांचा अपघात झाल्याचे लक्षात आले. त्यांनी तत्काळ रुग्णवाहिका मागवत जगताप यांना उपचारासाठी चाळीसगाव येथे हलविले. मात्र रस्त्यातच त्यांचा मृत्यू झाला. बुधवारी दुपारी त्यांचेवर अंत्यसंस्कार करण्यात आले. पश्चात आई, पत्नी, दोन मुलं सुना असा परिवार आहे. या घटनेने हळहळ व्यक्त होत आहे.
