जळगाव : प्रतिनिधी
शहरातील एका रुग्णालयातून काम संपवून घरी परतत असताना एका अज्ञात वाहनाने दिलेल्या धडकेत यावल तालुक्यातील आडगाव येथील ३२ वर्षीय युवकाचा जागीच मृत्यू झाल्याची घटना मंगळवारी रात्री ११ वाजता ममुराबाद गावाजवळ घडली. जळगाव तालुका पोलिस ठाण्यात अज्ञात वाहनचालकावर गुन्हा दाखल करण्यात आला आहे.
मिळालेल्या माहितीनुसार, राजेश दिलीप पाटील, असे मयत तरुणाचे नाव आहे. तो जळगाव शहरातील एका खासगी रुग्णालयातील पॅथॉलॉजी लॅबमध्ये कामाला होता. रात्री काम संपवून दुचाकीने आडगावला जायला निघाला. ममुराबाद गावाच्या पुढे यावलकडून जळगावकडे जाणाऱ्या एका अज्ञात वाहनाने राजेशच्या दुचाकीला धडक दिली. त्यात राजेशचा जागीच मृत्यू झाला.
ममुराबाद येथील काही तरुणांनी घटनेची माहिती पोलिसांना कळवली. पोलिसांनी राजेशचा मृतदेह जिल्हा शासकीय वैद्यकीय महाविद्यालय व रुग्णालयात आणला. तसेच मृतदेहाची ओळख पटल्यानंतर आडगाव येथील पुरुषोत्तम भालेराव या युवकाला अपघात झाल्याचे कळविले. त्यानंतर रात्रीच राजेशच्या नातेवाइकांनी जिल्हा रुग्णालयात गर्दी केली. राजेशच्या पश्चात आई, वडील, पत्नी, ८ वर्षांचा मुलगा, पाच महिन्यांची मुलगी, भाऊ, असा परिवार आहे.
